كود هناء ابو علي ///

فضيحة جديدة فحزب الاستقلال. الاستماع لاكثر من مرة لرئيس غرفة الصناعة والتجارة والخدمات فالدار البيضاء الكبرى حسن البركاني فقضية مافيا المخذرات ديال شي حد اسمو بوجمعة. صاحبنا بوجمعة واللي معاه جبدو البركاني وقدموه كاحد زعماء هاد الشبكة. 
طبيعي الفرقة الوطنية للشرطة القضائية تستمع ليه باذن من القضاء. هاد الشي اللي كان ولكن حزب الاستقلال ما هدرش ما خرج لا بيان لا والو. 

دابا هاد البركاني خاصو يستاقل حتى يحدد القضاء دورو فهاد الملف. راه كيضر بهاد الغرفة. 
البركاني على يمشي يدافع على راسو قدام المحققين والقضاء خرج فتصريح غريب ل”اذار” قال فيه باللي “الاتهامات فارغة”. هادي ماشي هو اللي خاصو يقولها. القضاء هو الوحيد اللي ممكن يقولها بعد ما يسد الملف. 

صاحبنا لصق هاد الشي ف”خصوم سياسيين” بغاو يحيدوه من رئاسة الغرفة وربط هاد العملية اللي فيها اتهام بالاتجار الدولي فالمخدرات عبر عصابة وبين “الطعون المتكررة” ضدو فانتخابو على راس الغرفة وبين هاد الملف ديال المخدرات. 

بغى يقول باللي خصومو هما للي داروه فهاد الملف؟ يعني ولينا من جمهوريات البنان وصافي ماشي دولة عندها قواعدها. هاد الاتهام خطير من واحد متهم اصلا 

الياس العماري كان كيعرفو مزيان ويعرف ماضيه. جابو باش كان امين عام للبام وخلاه يتكلف بالحملة المخصصة لغرفة الصناعة والتجارة والخدمات ف2015 من الفها لياءها وفاللخر قال ليه سير فحالك وطلع مصطفى امهال فبلاصتو. ديك الساعة كان البركاني فالبام. كان كيخاف من الياس بزاف. خوف ما عمرنا فهمناه. اليوم ولى كيهدر علي “تشويه سمعتو” كيف صرح ل”اذار”