محمد سقراط-كود///
مثلا إلى خرجات ابتسام لشگر وهاجرات لشي دولة أوروبية وطلبات اللجوء الإنساني، منطقيا راه من حقها وسلوك منطقي لأنها دوزات الحبس على حرية المعتقد، أو واحد مثلي تشدو هو وصاحبو او تعرض لاعتداء جماعي موثق، ومشا طلب اللجوء راه منطقيا من حقو وخاص يدير هاد الخطوة وخاص يتعطى ليه الحق في اللجوء لأنه مظطهد، راه بزاف من لي دخلوا لسبتة ولي كيطلبوا اللجوء ديما، إما يدعون أنهم مثليين أو هم كذلك ومظطهدين لأنه كاين قانون كيعاقبهم إلا دارو علاقة بيناتهم، أو مثلا دوك الشباب لي كانوا كياكلوا في نهار رمضان في القهوة ووقفات عليهم سطافيط والكاميرات وهز.. قلب.. كتب.. قيد.. قدم، هادوا الى طلبوا اللجوء في أوروبا واه من حقهم لأنهم دارو سلوكات عادية مكتشكل خطر على تاواحد ومع ذلك تشدو ومنهم لي مشا للحبس.
أو هادوك الدراري لي كانوا كيتصنتوا غير للهارد روك وسيفطوهم للحبس بدعوى عبدة الشيطان وخلاو اللحايا والإرهابيين كيقادوا القنبول باش يفرگعوا كازا، راه اغلبهم فاش خرجوا مشاو لأوروبا وهذا سلوك عادي ومنطقي ومنتظر، آش غادي تبقى تدير في دولة كتسيفطك للحبس غير حيت كتصنت لموسيقى مكتعجبش موالين الوقت، علما أن رموز داك الموسيقى جاو لموازين من بعد ديپ بورپل وسكورپيون وپلاسيبو، أو مثلا غير كوپل تشدو كيمارسوا الحب بالتراضي في دار او زبالة أو مقبارة، وكيشدوهم وبالمينوط والكاميرة كتصناهم عند الدروج، ويبانوا طالعين في السطافيط بحال الى كانو في عصابة الخنفوري، راه عادي يحاولوا يهاجروا لاوروبا ويطلبوا اللجوء، راه كون غير كانوا كيطلبوه غير في أوروبا راهم في اغلب العالم في البرازيل وكوريا وعدة دول.
راه خاص المغرب يدير الخطوة اللولة ويسد هاد الباب، يشوف هاد ملفات اللجوء لي كيدفعوا المغاربة لاوروبا شناهي أكثر حاجة كيتشكاو منها ويحيدها، وهاكا ماغاديش يبقى سبب لطلب اللجوء، داك الساعة غادي يمشي شي مغربي لسبانيا ويقوليهم أنا مثلي مظطهد غادي يقولوا ليه” لعنة الله عليك المغرب راه مابقاش كيعاقب على المثلية”، كذلك مع حرية المعتقد والعلاقات الرضائية والحريات الفردية والسياسية والدينية والعقائدية بصفة عامة، راه ماشي خاص نتسناو أوروبا تولي ترفض للمغاربة اللجوء خاص المغرب يطلق الحريات ويلغي الشروط الذاتية الشروط الذاتية والموضوعية لي تخلي الشباب باغي يهزب ويتذرع أو يدعي انه يعاني من قيود هي كاينة في الواقع وفي القانون والناس مشدودين على ودها في الحبس.