الرئيسية > آراء > راه باش تقيس درجة تطور شي بلاد ماكاتشوفش واش فيها موروكومول و لا آنفا بلايس و لا كازا فايننس سيتي ! باش تقيس حضارة دولة و درجة تطورها غاتشوف المدارس ديالها كي دايرين و جودة التعليم لي فيها اما ما تبقى راه غي عكر على الخنونة
29/09/2019 17:00 آراء

راه باش تقيس درجة تطور شي بلاد ماكاتشوفش واش فيها موروكومول و لا آنفا بلايس و لا كازا فايننس سيتي ! باش تقيس حضارة دولة و درجة تطورها غاتشوف المدارس ديالها كي دايرين و جودة التعليم لي فيها اما ما تبقى راه غي عكر على الخنونة

راه باش تقيس درجة تطور شي بلاد ماكاتشوفش واش فيها موروكومول و لا آنفا بلايس و لا كازا فايننس سيتي ! باش تقيس حضارة دولة و درجة تطورها غاتشوف المدارس ديالها كي دايرين و جودة التعليم لي فيها اما ما تبقى راه غي عكر على الخنونة

سهام البارودي – كود//

لاماخفت نكذب الطفل المغربي هوا واقيلة التلميذ الوحيد لي كايقرا السيمانة كاملة من الاثنين تال السبت مع الستة د العشية و ماعندوش الويكاند فيه يوماين باش يرتاح ! يعني فحال التلميذ فحال البناي عندهم غا نهار واحد روبو فالسيمانة! ماغايسافر مع واليديه فالويكاند ماغايمشي لحمام ماغايرتاح فخاطرو ! عكس الدراري لي فالمدارس الخاصة لي كايرتاحو لاربع فالعشية و السبت و الاحد !  و علاش هادشي ؟ حيت فاغلب المدارس عدد الحجرات غير كافي و عدد الاساتذة غير كافي ، يعني ضروري تقسم التلاميذ لافواج و يدخل هادا و يخرج هادا فحالا شادين النوبة على كابينة ماشي على قسم ! و الفيديو لي خرج مؤخرا صوراتو واحد الاستاذة نواحي الشاوية ماهوا الا فيديو بسيط و غايكونو منو عاداد كون گاع الاساتذة و المعلمين صورو الحجرات الدراسية فين كايخدمو ! و صورو الكوابن لي كايمشيو ليهم التلاميذ ! و صورو الساحات المدرسية لي زعما مديورة باش التلميذ يفوج فيها !

بلا فيديوات ! گاع لي قراو فالمدارس العمومية عارفين بلي اغلبها غير صالح للتعليم ، غير صالح لاستقبال جحافل التلاميذ كل سنة و توفير ظروف ملائمة للتلقي ! كاينين مدارس لي مافيهاش لافام د ميناج التلاميذ هوما لي كايتفارو فجافيل و التيد و كراطة و كايجيو يسيقو الاقسام ! كاينين مدارس بلا حراسة بلا سيكيريتي كايدخلو ليهم الشفارة و الشماكرية و كايرهبو الناس لي خدامين و لي كايقراو !

حتى من الاساتذة اليوم ! اطر وزارة التربية الوطنية شحال فيهم لي كايقري ولادو فالمدرسة العمومية ؟! اكيد نسبة قليلة بزاف ! حيت غير البوفري لي غايسيفط ولدو يقرا مع خمسين فالقسم وسط حيوط رايبة و كوابن موسخة يقدر يجيب منها شي كوليرا !

المدرسة العمومية راها مشكلة كبيرة ! و غادا عام على عام كاتزيد تتكفس ! لا الاطر لي فيها اغلبهم ما عندهمش مايكفي من التكوين و الكفاءة باش يدرسو لا الحجرات كافية ! و هاهي گاع كاينة واش غير لي ربعة د الحيوط و سبورة و طباشير هي باش غاتقري ولد القرن الواحد و العشرين ! فعصر التيكنولوجيا الدقيقة! لا تجهيزات تليق بكرامة الاستاذ و التلميذ !

راه باش تقيس درجة تطور شي بلاد ماكاتشوفش واش فيها موروكومول و لا آنفا بلايس و لا كازا فايننس سيتي ! باش تقيس حضارة دولة و درجة تطورها غاتشوف المدارس ديالها كي دايرين و جودة التعليم لي فيها اما ما تبقى راه غي عكر على الخنونة.

موضوعات أخرى