كود سبور//

مازال الوداد الرياضي غادي فالخسران تحت رئاسة هشام آيت منة، اللي واخا بدل المدربين راه الفريق مازال عاطيها للخسران والنتائج السلبية، والحمرا خسرت تاني وهاد المرة مع نهضة الزمامرة اليوم الاحد فالزمامرة ضمن الدورة 18 من البطولة الاحترافية.

الماتش بين نهضة الزمامرة والوداد الرياضي هو الأول ديال المدرب الجديد محمد بنشريفة ولد الحمرا، بعد لفراق مع المدرب الفرنسي باتريس كارتيرون بسبب سوء النتائج، والوداد تاني خسرت بنتيجة واحد لزيرو، وهدف الرباح ديال الدكاليين ماركاه رضا آيت بوغيما.

الوداد الرياضي بعد الخسارة باقيين غاديين فتضياع النقاط، والفرق بقى مؤقت فالمركز 4 برصيد 31 نقطة، أما الزمامرة خداو ثلاث نقاط وولات عندهم 19 نقطة ومحتلين المركز 10.

الوداد الرياضي راه خاصها رئيس يكون قادر عليها ماشي غير مدرب وهاذ الشي كل ماتش كايزيد يتأكد، داكشي علاش الوداديين رفعو شعار الرحيل فوجه هشام ايت منة بعدما أكد الفشل ديالو وتعطاتو شحال من فرصة ولكن ما قدرش على الفرقة.