كود سبور//

فرگع الإعلام الفرنسي حقائق جديدة على الفيستيير ديال باريس سان جرمان الفرنسي اللي كان عامر فالسنوات الماضية بالنجوم العالميين، وكشف أن العلاقات بين اللاعبين ما كانتش زوينة فالكواليس كيفما كان كيبان فالماتشات قدام الجمهور، ومن بينها علاقة النجم المغربي اشرف حكيمي مع الأرجنتيني ليونيل ميسي، اللي نوضوها شي مرة.

وكشفت جريدة “ليكيب” الفرنسية، أن النجم المغربي أشرف حكيمي هو الأسطورة ليونيل ميسي تناگرو الموسم الماضي ملي كان اللاعب الأرجنتيني مازال كيلعب مع PSG، وأن هذا الشي وقع بين الفريقين من ورا شي حصة تدريبية ديال باريس سان جرمان، وأن البرازيلي نيمار جونيور حاول يدافع على صاحبو ميسي، ولكن الصبليوني سيرجيو راموس ناض له وقال له إلا ما دخلتيش سوق راسك غنوريك.

هاد الرواية نقلتها الجريدة الفرنسية من عند شي شاهد كان حاضر فالواقعة، واللي قال أنه مزيان ملي كان سيرجيو راموس حاضر.

للإشارة فعلاقة زوينة سنوات هادي ما بين اشرف حكيمي وسيرجيو راموس ملي كانو كيلعبو فريال مدريد الاسباني، وكان راموس شاهد على بدايات حكيمي مع الريال حيث النجم المغربي ولد مدرسة الفريق الاسباني.