كود سبور//

من الأفضل أن الدولي المغربي نصير مزراوي يديها فالكورة ويركز على الكاريير ديالو مع مانشستر يونايتد النگليزي باش ينفع راسو وينفع المنتخب الوطني المغربي، كثر ما يديها فشي حاجة اخرى بعيدة على الرياضة، وما ينساش انه كايلعب فبطولة عندها قوانينها وكلشي فيها خاصو يحتارم كلشي.

فحسب جريدة The Athletic البريطانية، إضطر لاعبو مانشستر يونايتد النگليزي أنهم ما يلبسوش دجاكيطات ديال أديداس فيها رموز لدعم المثلية الجنسية، قبل ماتش الفريق ديالهم ضد ايفرتون الاحد اللي فات ضمن بطولة النگليز، بسبب نصير مزراوي اللي ما بغاش يلبس دجاكيط.

مانشستر يونايتد يا لاه بداو كايخرجو من النتائج السلبية، وهو بالنسبة لهم لاعب مهم بزاف، وهذا الشي اللي دار قبل ماتش ايفرتون كان ممكن تكون عندو انعكاسات خايبة على الفريق ويتسبب فالخروج ديالو هو وصحابو من التركيز على الماتش، خصوصا وانه المدرب ديالهم مازال جديد، ويالاه كايقدو الأمور بعد بداية صعيبة فهذا الموسم بدلو بسببها المدرب وكايقلبو دابا على الاستقرار التقني والاستقرار فالنتائج واي حاجة تقدر تزعزع او تهدد هذا الاستقرار غايحيدوها.

ولحسن الحظ ديال نصير مزراوي أن مانشستر يونايتد ربحو ايفرتون بنتيجة 4 لزيرو، او لا كان كلشي غايتقلب عليه لو أن الفريق خسر الماتش، حيث عدد من الحوادث الممثالة كان عندها انعكاسات سلبية على الاندية والمنتخبات قبل الماتشات وفالبطولات اللي مشاركين فيها، بحال منتخب ألمانيا ملي اللاعبين ديالو تصورو وهما دايرين يديهم على فمهم فمونديال 2022،  احتجاجا على منع الفيفا شارة الكابيتان اللي فيها ألوان المثلية، وهذا الشي تسبب فأنهم خرجو من التركيز على المونديال وكانت النتائج ديالهم كارثية.

الرياضي او النجم خاصو يعرف يركز على الكاريير ديالو، ويعرف أن الحياة ديالو فالرياضة قصيرة وخصوصا كرة القدم، ويكون محترف ويبعد على أي حاجة تقدر تؤثر عليه بشكل سلبي، ومادام اختار هذا المجال إلا وخاصو يندمج معه واخا يكون مختلف فشي حوايج على الأفكار ديالو، وبحال نصير مزراوي راه هاد المرة لافير ديال دجاكيط اديداس سلكت وممكن يدوزوها له مانشستر يونايتد، ولكن واش غايصبرو مرة اخرى على هذا الشي ؟ اكيد لا.

واش غايضحيو مانشستر يونايتد بصفقات مع محتضنين وليسبونسور على قبل لاعب واحد فالفريق ما عاجباهش واحد الحاجة؟ طبعا راه ما يمكنش وراه نصير مزراوي عندو عقد مع النادي كايعطيهم بالموجب ديالو خدمات مقابل الفلوس وخاصو يحتارم هذا الشي، وعندو الزهر دار هذا البلان فمجتمع بحال بريطانيا والنگليز كيفما فايت له دارها فبايرن ميونخ الالماني ملي ما كانش كايبغي يشد البيرا فتصويرة الفريق مع المحتضن ديالو، وكايدوزوها له حيث يؤمنون بالاختلاف، أما كون كان محترف فشي بطولة دولتها متطرفة دينيا بحال ايران ورفض شي حاجة كايدعموها موحال يدوزوها له.

للاشارة، الدجاكيط ماشي اديداس اللي قالت ليهم لبسوها، كان قرار دالفرقة ماشي د السبونسور، وحقاش مزراوي لعاب مهم والمدرب متشبث بيه قال ليهم المدرب بلاش.

كان غادي يكون ملزم يلبسها كون القرار ديال السبونسور.