وكالات//

فواحد الحكاية غريبة اللي كتورّينا شحال ممكن يوصل بعض الناس باش يتهربو من التسوّق، راجل روسي متّهم دابا بجريمة حيت كذب ودار راسو تسرقات ليه الطوموبيل غير باش ما يمشيش للمول مع مراتو .

الواقعة وقعات فشهر أبريل اللي فات، والبوليس عاد خرج التفاصيل دابا. المرا ديالو هي اللي عيطات للطوارئ وقالت ليهم بلّي طوموبيل د راجلها، من نوع تويوطا كورولا، تسرقات من الباركينغ اللي قريب من دارهم. من بعد، عاودات عيطات وقالت بلّي لقاوها فواحد الجزيرة سميتها أودتخي، ما بعيداش بزاف على الدار.

منين مشاو البوليس يشوفو الطوموبيل، لاحظو فيها آثار ديال الكسر ومفتاح التشغيل مخدوم فيه، بحال إلى فعلاً شي حد حاول يسرقها. ولكن منين بداو يسوّلو الراجل، القصة ديالو ولات فيها بزّاف ديال التناقضات، وكل ما زاد الضغط عليه، القصة ولات كتحماق أكثر.

من بعد ما دارو تحقيق معمّق، البوليس استنتجو بلّي الراجل هو اللي دار المسرحية كاملة بوحدو. عطّل الطوموبيل ديالو ودار القصة باش يبرّر لمراتو علاش ما غاديش يمشي معاها للتسوّق .

ورغم أنه ما كانش عندو سوابق، دابا كيواجه حكم ممكن يوصل لعامين ديال الحبس حسب المادة 306 فالقانون الجنائي الروسي، اللي كتخص “التبليغ الكاذب”. وزيدون، فرضو عليه ما يسافرش حتى يكملو التحقيقات.