وكالات//

واحد الراجل فالأردن طلق مراتو من بعدما شافها وسط العيالات اللي مشاو يستقبلو الفنان اللبناني راغب علامة فواحد الحفل دارو هاد الأيام.

المرأة مشات لمطار الملكة علياء باش تكون مع المعجبين، اللي كانو أغلبهم نساء، تستقبل الفنان، وداكشي بلا ما تعلم راجلها ولا تاخد الموافقة ديالو، حسب ما قالت جريدة “السوسنة” وبعض المواقع المحلية.

وزادت الطينة بلة حيث المرأة كذبات على راجلها وقالت ليه غادي تمشي تزور عائلتها فنهار اللي وصل فيه راغب علامة، ولكن فالحقيقة مشات للمطار، وبالصدفة شافها راجلها فواحد الفيديو اللي تنشر مع فيديوهات أخرى توثق الاستقبال ديال الفنان فالأردن.

القضية دارت البوز فالسوشيال ميديا، وتعرضات المرأة لانتقادات كثيرة حيث كذبات على راجلها، وبالمقابل كانو شي ناس قلّين تعاطفو معاها ووقفو في صفها.