وكالات//

فركع المغني الميريكاني راي جي، قنبولية جديدة في قضية الرابور شون ديدي كومبس، لي مشدود في الحبس ومتهم بتهم ثقيلة بزاف.

وقال راي جي، في آخر الخرجات الإعلامية ديالو، أن بزاف ديال الفنانين المشهورين كيدفعو دابا الزبابل ديال الفلوس باش ميتجبدش الاسم ديالهم في هاد لافير.

في حوار ليه مع موقع TMZ في إطار الفيلم الوثائقي “Freak-Offs” لي داروه على “سقوط ديدي”، أكد راي جي أن فلوس صحيحة تصرفات فهادشي.

وزاد كيقول أن الدفاع ديال ديدي توصل بفلوس صحيحة منهم باش مايجبدوهوش في القضية ديالو لي عطات ريحتها في العالم كامل.

وكيجي هادشي في الوقت لي ضارب فيه الدفاع ديال ديدي الطم، ومزال لحد الآن ماجاوبوش على هادشي.

ونهار 5 ماي من عام 2025 غادي تبدا المحاكمة  د ديدي، ولي متابع فيها بتهم الاغتصاب والاستغلال الجنسي والاتجار في البشر.