كود ـ كازا//

المواطن فكازا كيلاحظ هاد الأيام ارتفاع كبير فأسعار الخضرا والفواكه، خصوصا البطاطا والبصلة، والديسير اللي ولاو كيوصلو لأثمنة صاروخية خارج سوق الجملة، وهادشي بدا كيأثر مباشرة على القدرة الشرائية ديال العائلات.

وفي تصريح خاص لكود، وضح عبدالرزاق شابي، رئيس جمعية مارشي كريو، بأن السبب الرئيسي فهاد الغلاء هو التصدير العشوائي ديال هاد المنتوجات لأفريقيا بلا احترام أي معايير جودة، وقال حرفيا: “كولا كيدفن باه فين بغا”. وأشار إلى أن السوق المحلي كيعاني من استنزاف المنتوجات بسبب هاد التصدير، وهادشي كيخلق فرق كبير بين العرض والطلب، وبالتالي كيأثر على الأسعار اللي كيتلقاها المواطن فالحي ديالو.

وشابي أكد أن الأسعار فأسواق الجملة مرتفعة شوية، ولكن الفارق الكبير كيظهر فالأسواق الكبرى والأحياء الراقية، اللي كتعرض نفس المنتوجات بأثمنة مضاعفة.

وأضاف أن التصدير كيتم بكثرة لأوروبا وروسيا والخليج، اللي كيتطلبو شروط صارمة للجودة، ولكن أفريقيا ما عندها حتى شروط، وهادشي كيأدي لاستنزاف السوق المحلي ويخلي الأسعار ترتفع  .

وأشار كذلك أن البصلة كتقطف فشهر 9 و10، وهاد الفترة كتمشي “كاميونات” ديالها لأفريقيا، وهادشي طبيعي يرفع الثمن فالسوق المحلي، والمواطن هو اللي كيتحمل هاد التكلفة.

وعن تأثير التساقطات الأخيرة، قال شابي إن الأمطار الثقيلة ضرات البطاطا، البصلة، الفريز، الحوامض والفواكه فالجهة الغربية، خصوصا اتجاه مكناس، لكنه أكد أن ارتفاع السدود على المدى الطويل غادي يجيب الخير للسوق، غير دابا خاصنا نصبرو خمس أشهر باش نلمسو هاد الخيرات.

وختم المتحدث وقال إن الأسواق باقي مرجعاتش النشاط ديالها، ومن المرتقب مع الوقت ترجع الأسعار لطبيعتها، وكيطمح أن هادشي اتقنن وتأثر مع الوقت.