سامي العلوي -گود كاز//

جمال الزاهي لي هو رئيس ديال جامعة الحسن الأول بسطات بالنيابة، وهو نفسو عميد كلية الاقتصاد والتدبير، لي ممتيقش راسو لدابا بلي هو عميدها، ما علينا هاد الرئيس خدام بمقولة “تازة قبل غزة” بحيث كيجر للقبيلة ديالو واخا كتبان أمور بسيطة ولكن فعمقها هي حگرة لفقراء سطات وللناس فإقليم سطات، فبنحمد وراس العين وسيدي حجاج ودوار الحنافات ولا مي زهرة والبروج.. گاع عندهم ميلبسو فهاد البرد.

نشرات الصفحة الرسمية ديال جامعة الحسن الأول فسطات صورة لبعض موظفي وموظفات جامعة الحسن الأول بسطات كتبين أن هاد الموظفين لي كيسيرهم الرئيس بالنيابة مشاو لدوارو فتازة ووزعو حوايج على الفقراء.

حنا في “گود” معندنا مشكل الفقير يستافد فهاد البرد، ولكن المصيبة هي فين وذنك هااااهي، مخلين إقليم كلو فقراء ومعندهم باش يدفاو في هاد البرد، وهازين الكار بمازوطو تالتازة لي هي فالأصل تابعة ترابيا لجامعة فاس العالمة ولي موزعة جامعة سطات فترتيب الجامعات عالميا.

مصادر ديال “گود” أكدات أن جمال الزاهي رئيس جامعة الحسن الأول بسطات بالنيابة قام بتوجيه موظفي الجامعة باش يديرو هاد الحملة عندو فدوارو مع قرب الپريمات ديال راس العام، وهاد الشي ديال زرع قيم التآزر الأحرى به يتزرع فسطات، والإنسانية هي حماية كلية الحقوق من الفضايح وزيد عليها فتح تحقيقات فشكايات الناس وزيد وزيد.