الرئيسية > آراء > رئيس الوداد داها فالصراعات الخاوية ودخل فحروب من التحت ضد لقجع والنتيجة: خسر فبركان والبطولة قريبة تمشي ليه
07/08/2020 10:00 آراء

رئيس الوداد داها فالصراعات الخاوية ودخل فحروب من التحت ضد لقجع والنتيجة: خسر فبركان والبطولة قريبة تمشي ليه

رئيس الوداد داها فالصراعات الخاوية ودخل فحروب من التحت ضد لقجع والنتيجة: خسر فبركان والبطولة قريبة تمشي ليه

كود كازا ////

سعيد الناصري رئيس الوداد البيضاوي المسؤول الاول على لخسارة اللي تعرضات ليه الحمرا البارح ضد بركان. مسؤول كثر من المدرب واللعابة. علاش؟ حقاش ما داهاش فالفرقة مؤخرا. دخل فحروب خاوية ماشي فصالح الوداد ضد جهات منها رئيس الجامعة الملكية لكرة القدم فوزي لقجع. داك الشي اللي دارو فصيل ودادي ديال “مافيا لقجع” على حيوطا فكازا ومدن اخرى كانت خطأ وفضيحة. 

علاش حقاش رئيس الوداد تم اتهامو وعوض ما يخرج يهدر يدافع على راسو٬ رجع اللاور. سكوتو مشكلة. خاصو يهدر. خاصو يدافع على فرقتو. المطالبة بعدم استكمال البطولة بسباب الجايحة واعطاءها للوداد ما كيشرفش نادي بحال الحمرا. 
واخا خرج فصيل واكد فبيان رسمي انو هو مول هاد الشعار٬ ما حيدش التهمة على رئيس النادي.

هادا كيبين باللي الفرقة تضررات من هاد الشي. التركيز ما بقاش على الكورة. على امور خارجة على الكورة. الناصري ما وجدش للمدرب اللعابة اللي يقدر يمكن بيهم البطولة ايلى تصابو الرسميين. ما ننساوش راه تابعانا نصف نهاية الشامبينز ليك الافريقية فالشهر الجاي. يعني خاص فرقة. 

الصدفة ان الشرق وقف الوداد ويقدر يتسبب فازاحتو على الصدارة. لعب مع وجدة وتعادل بدون اقناع ولعب مع بركان فرقة فوزي لقجع وخسر. خسارة مدلة للرئيس للوداد للجمهور. انتقام من النادي البرتقالي لداك الشي اللي وقع لرئيسهم الحقيقي. 

الوداد دابا بعيدة بنقطة وحدة على بركان والراجا. خسرات تركيزها. لعب رئيسها دور فهاد الشي. الرئيس مهمتو بالاضافة الى وجد كاع الظروف وما يخليش المدرب واحل كيف وقع لگاريدو مدرب الحمرا٬ البارح فبركان٬ وخاصو يكون مع الفرقة. مع اللعابة. يشجعهم يدعمهم. يقدرو يديموراليزاو يقدرو يتنرفزو. خدمة المكتب يدخل فالوقت المناسب. هاداك الوقت كان بعد ماتش وجدة. رئيس الوداد ما دارهاش. جات كبوة بركان. 

هادي كبوة قاصحة. يقدر النادي ما ينوضش منها. خاص الرئيس ينسى حروبو ويديها فالفرقة. هادوك الشعارات اللي تهزات ضد لقجع غادية تكون ضدو ايلى خسر شي ماتش اخر. 

موضوعات أخرى