كود -Brussels Times //

حذّرات الجالية اليهودية المغربية فبروكسيل من تصاعد خطير فموجة معاداة السامية فالعاصمة البلجيكية، هاد الشي جا على لسان رئيسها موريس طال، اللي صرّح لجريدة Brussels Times بأن ”باش تلبس الكيبا فالمغرب ولى أسهل بزاف من بلجيكا“ وقال: “إلى مشيت لمحطة بروكسيل-ميدي وأنا لابس الكيبا، ممكن نتعرض للسبان والمعيور”، وزاد بأن بعض أفراد الجالية ولاو كيتفاداو يهضرو بالعبرية فالفضاء العام.

ومن البيرو ديالو، اللي فيه الراية المغربية حدا الدرابو الإسرائيلي، ذكّر بالموقف ديال الملك محمد السادس اللي كيشدد على ضرورة حماية اليهود، فمقابل إحساس كيكبر بعدم الأمان وسط الجالية فبلجيكا، وهاد الإحساس بدا كيتحوّل لقرارات حقيقية؛ حيث قالت نهامة توايل، اللي عايشة فبروكسيل من مدة طويلة، باللي ولادها “ما غاديش يعيشو هنا”، وحتى بعض العائلات خواو البلاد فعلاً.

وكتأكد الأرقام الرسمية هاد التخوفات؛ حسب هيئة Unia لمكافحة التمييز، تسجلو 232 اعتداء معادي لليهود فبلجيكا عام 2025، مقابل 129 حالة فـ2024، يعني ارتفاع ب 80% غير فعام واحد ،وكتشير الهيئة حتى أن بزاف ديال الحوادث فيها خلط بين اليهود فبلجيكا والدولة الإسرائيلية وسياساتها.

وفهاد السياق، الجيش البلجيكي انتشر هاد السيمانا حدا الكنس اليهودية والمدارس اللي فيها أغلبية يهودية فعدة مناطق فالبلاد، وكشف استطلاع دارتو مؤسسة إيبسوس بأن 40% من سكان بروكسيل كيشوفو أن اليهود كيتحكمو فالفلوس والأعمال، و22% ما كيعتابروش اليهود مواطنين بلجيكيين بشكل كامل.