عن الوكالات ////

نائب رئيس امريكا فانس هدر على فشل المفاوضات فالتوصل لحد مع ايران بعد محادثات باسلام اباد بباكستان دامت 21 ساعة الجمعة السبت. اما رئيس المفاوضين الإيرانيين، محمد باقر قاليباف، فقال باللي ميريكان فشلات فكسب ثقة الوفد الايراني فهاد المحادثات الاولى من نوعها من وصول نظام الملالي للحكم فايران.
قاليباف كتب فصفحتو على اكس “قبل ما تبدا المفاوضات، گلت باللي نيتنا مزيانة وباللي خاص العزيمة حقاش كاين تجارب جوجت الحروب” واكد باللي “ما كيثيقوش بالطرف الاخر” فاشارة لميريكان.

قاليباف اكد باللي الوفد الايران 168 مقترحا سماه ب”البناء والمستقبلي” وزاد “الطرف لاخر فشل فكسب ثقة الوفد فهاد الجولة”

غير رئيس البرلمان الايراني كيشوف جانب ايجابي فهاد المفاوضات “مريكان فهمات منطقنا ومبادئنا. دابا خاصها تقرر واش قادرة تكسب ثقتنا ولا اللا”

قاليباف، كان عسكري سابق فنظام الملالي، اعتابر باللي “الديبلوماسية طريقة أخرى مع الكفاح العسكري لضمان حقوق الأمة الإيرانية. ما غادينش نتوقفو والو على جهودنا لترسيخ إنجازات الدفاع الوطني الإيراني الذي دام 40 يوماً”.

وكان الناطق الرسمي باسم الخارجية الايرانية إسماعيل بقائي، وضح باللي كاين خلاف مع ميريكان على 2 حتى 3 قضايا هي اللي منعات التوصل لاتفاق مع ميريكان فاشارة الى الملف النووي واصول ايران المجمدة