گود سبور//

خرج رفاييل لوزان رئيس الاتحاد الإسباني لكرة القدم، بعضو على فين غادي يتلعب فينال كاس العالم 2030، ضمن التنظيم الثلاثي لهاد النسخة من المونديال بين المغرب وإسبانيا والبرتغال، وقال ان استضافة النهائي خارج إسبانيا ماشي منطقي.

وفتصريحات لراديو ناسيونال دي إسبانيا نقلها موقع Goal، قال رفاييل لوزان رئيس الاتحاد الإسباني لكرة القدم: “ماشي معقول تنظم شي دولة اخرى من إسبانيا هاد الماتش فينال ديال كاس العالم، واسبانيا باغيا تنظمو، وهذا الشي اللي خاص يكون، حيث كانت متزعمة مع البرتغال، وحنا كانمثلو 55% من حجم تنظيم هذه البطولة”.

وكمل رئيس الاتحاد الإسباني وقال: “انتما عارفين شنو كاتمثل إسبانيا فالعالم، واي حاجة اخرى من غير فوز إسبانيا بتنظيم الماتش فينال غادي تكون شي حاجة ما مفهوماش”.

وكاتجي هذه التصريحات من رئيس الاتحاد الاسباني لكرة القدم، مع المنافسة القوية بين المغرب واسبانيا على تنظيم نهائي مونديال 2030، وسط تسريبات منذ مدة على ان الملف المغربي بتيران الحسن الثاني الكبير فالدار البيضاء، متفوق فسباق تنظيم نهائي المونديال على ملفي إسبانيا اللي كاتنافس بتيران سانتياكو برنابيو فمدريد والكامب نو فبرشلونة.