گود سبور//

خرّجت كلمة فوزي لقجع رئيس الجامعة الملكية لكرة القدم، والقيادي الأول فحزب الأصالة والمعاصرة، اللي قال فيها إن “تيران الحسن الثاني فبنسليمان” غادي يتلعب فيه فينال مونديال 2030، (خرّجت) رئيس الاتحاد الإسباني لكرة القدم رفاييل لوزان على السكات ديالو بعدما زعزعت الرأي العالم الإسباني.

وأكد رفاييل لوزان فتصريح لراديو COPE الإسباني، أن إسبانيا ما تقدرش تنسحب من التنظيم المشترك لكاس العالم 2030، إلى النهائي كان غادي يتلعب فالمغرب، وأن الصبليون موقعين على اتفاقيات مع البلدين الآخرين الشريكين فالتنظيم (المغرب والبرتغال)، ومع الهيئات الكروية العليا.

أما بخصوص خبر استضافة الدار البيضاء لنهائي كاس العالم 2030، قال رئيس الاتحاد الاسباني لكرة القدم، انها داخلة فالحملة الانتخابية فالمغرب، وأن إسبانيا عندها القدرات لتستضيف ماتش الفينال ديال المونديال.

وبالنسبة للتوزيع الجغرافي ديال المدن المستضيفة لماتشات كاس العالم 2030، قال رفاييل لوزان إن ملف الترشح الأولي فيه 9 مدن إسبانية، وكاينين مساعٍ باش يزيدو 2 مدن من الصبليون هما فيگو وفالنسيا، وأن المغرب داخل بـ6 مدن والبرتغال بثلاث مدن ولكن حتى شي حاجة مازال ما تحسمت فهاد الشي.

رئيس الاتحاد الإسباني لكرة القدم، قال إن قرار اختيار تيران فينال مونديال 2030، غادي يكون من بعد انتخابات الاتحاد الدولي لكرة القدم، اللي غادي تكون فالرباط العام الجاي، وان السويسري جياني إنفانتينو رئيس الفيفا، غادي يدير زيارة لإسبانيا هذا الخريف لمناقشة المعايير التنظيمية واستعراض ووضع ملف الترشح المشترك.