كود سبور//

طلقو بوليس ميريكان رئيس الاتحاد الكولومبي لكرة القدم رامون خيسورون بكفالة اليوم الثلاثاء، بعدما شدوه البارح الاثنين فميامي الأمريكية، حيث تم الاتهام ديالو بالاعتداء على بوليسي موظف فتيران “هارد روك” الاحد الماضي، ففينال كوبا أميركا بين كولومبيا والأرجنتين.

ووضحو بوليس ميامي فبلاغ لهم أن شدو خيسورون بتهمة “الاعتداء على ضابط موظف” الاحد فالعشية فتيران هارد روك، أما خيسورون فوضح بعدما تم الإفراج عليه بكفالة قيمتها 2000 دولار، أنه كانت عندو بطاقة تصريح لدخول أي بلاصة فالتيران ولكن بوليسي ما داهاش فيها، وكشف حسب تصريح نشراتو جريدة “هيرالدو”: “بززت عليه ندخل ودفعني وضاربنا”.

وكان فينال كوبا أمريكا بين الأرجنتين وكولومبيا عرف أحداث شغب، حيث عدد من الجماهير بغاو يدخلو للتيران بلا تذاكر، وهذا الشي تسبب فإصابات واعتقالات وسط الجمهور، وحسب البوليس ديال ميامي شدات شرطة ميامي 27 شخص فهاد الأحداث.