الرئيسية > تبركيك > رئيسة جهة طنجة وسفير المغرب فلندن ومسؤول بوزارة الصحة كيدورو بلا كمايم. لا الحساني لا حجوي كيحتارمو
15/07/2021 08:00 تبركيك

رئيسة جهة طنجة وسفير المغرب فلندن ومسؤول بوزارة الصحة كيدورو بلا كمايم. لا الحساني لا حجوي كيحتارمو

رئيسة جهة طنجة وسفير المغرب فلندن ومسؤول بوزارة الصحة كيدورو بلا كمايم. لا الحساني لا حجوي كيحتارمو

كود سعيد الشاوي ///

هاد ليام حالات الاصابة فكورونا فبلادنا غادية وتطلع. البارح فتنا الفين حالة. الحكومة كتشدد على ضرورة الالتزام بالتباعد وبوضع لكمايم. لكن هاد الميساج ما مسوق ليه حد.

لثلاث كان تقديم “شمال” وهي العلامة السياحية الجديدة لجهة طنجة تطوان الحسيمة فوطيل طنجاوي. حضراتو رئيسة الجهة البامية فاطمة الحساني. بلا ما نهدرو على هاد اللوگو الخايب ولا حتى الاسم اللي ناقصو الابداع واللي ختار الالوان كان همو غير السياسة٬ السيدة رئيسة الجهة دخلات لوطيل بلا كمامة. دخلات تحضر لنشاط رسمي بلا كمامة.

قبلها بايام كان سفير المغرب المعين اللي باقي ما مشاش لخدمتو حكيم حجوي فمعطم كازاوي معروف مع صحابو. اولا كان مع اكثر من 11 شخص. ثانيا كان كيتحرك بلا كمامة. كون دخل البوليس وشدو هادوك اللي تماك٬ كان غادي يكون معاهم.

شفنا حالة ثالثة مسؤول مركزي فوزارة الصحة البارح كيتمشى حدا الوزارة وما دايرش لكمامة حتى هو. وزارتو كتقول للمغاربة ديروها ووزيرو ايت الطالب ما قادرش يفرضها حتى على ناسو.

موضوعات أخرى

02/08/2021 14:30

كازا وصلات لمرحلة وبائية كاتخلع.. عدد من المرضى فـ حالة صعيبة مابقاوش لقاو بلاصة فـ أقسام الإنعاش والمنظومة الصحية دابا تحت ضغط كبير