كود سبور//
من المنتظر يكون التنافس على رئاسة الرجاء الرياضي، بين عبد السلام بلقشور رئيس العصبة الوطنية لكرة القدم الاحترافية، وجواد الزيات الرئيس الأسبق للنادي، لخلافة الرئيس المؤقت عبد الله بيرواين المطالب بالإعلان على جمع عام استثنائي لانتخاب رئيس جديد حيث الموسم سالا.
وبدا كل من عبد السلام بلقشور التحركات ديالو والمشاورات مع المنخرطين ديال الرجا كيفما كشف جورنال “گود” فوقت سابق، باش يترشح لرئاسة النادي، أما جواد الزيات فبدا المشاورات مع الحكماء وعدد من الرؤساء السابقين، باش يترشح ويرجع للرئاسة.
ومن المتوقع يكون سباق التنافس على رئاسة الرجاء الرياضي قوي بزاف بين عبد السلام بلقشور وجواد الزيات، حيث كل واحد فيهم عندو رغبة قوية باش يشد الرئاسة، وبالمقابل كشفت مصادر رجاوية، أنه كاين توجه ثالث داخل الرجا لفئة كاتشوف أنه ممكن الاستفادة من الثنائي بجوج فوقت واحد، من خلال ترأس بلقشور للجمعية الرياضية للنادي ويترأس الزيات الشركة الرياضية للنادي.
هذا التوجه كاين اللي كايشوفو داخل الرجا نيت أنه ما صالحش، وأن رئيس الرجاء الرياضي خاص يكون واحد، يجمع بين رئاسة الجمعية الرياضية ورئاسة الشركة الرياضية، لتفادي الصراعات الداخلية والخلافات فالتوجه وتسيير وتدبير المرحلة المقبلة، اللي الرجا محتاج فيها للهدوء والاستقرار، خصوصا وأن النادي ما بقاتش عندو قدرة يدخل فمشاكل داخلية.
