كود سبور//

كاتعرف الاستحقاقات التشريعية ليوم 23 سبتمبر 2026، مشاركة عدد من الشخصيات المعروفة فالمجال الرياضي بالتسيير فالاندية ديال الكورة والممارسة الرياضية فرياضات اخرى، واللي قررت تدخل الانتخابات.

ومن أبرز هاد الوجوه، كاين وزير الثقافة والشباب والاتصال مهدي بنسعيد رئيس نادي اتحاد يعقوب المنصور، اللي مرشح باسم حزب الأصالة والمعاصرة فدائرة المحيط فالرباط.

ومرشح حتى هشام ايت منة الرئيس السابق للوداد الرياضي، واللي نايض عليه النحل بسبب التسيير ديالو الفشل للفرقة وإغراقها فالكريديات، (مرشح) مع حزب التجمع الوطني للاحرار بدائرة المحمدية، وهو اللي ترأس المجلس الجماعي للمدينة من عام 2021.

وديما مع التجمع الوطني للأحرار، مرشح بالاسم ديالو رئيس الاتحاد الزموري للخميسات حسن الفيلالي والعضو بالمكتب المديري للجامعة الملكية المغربية لكرة القدم، واللي دخل الانتخابات فدائرة تيفلت الرماني.

اما مصطفى الخصم البطل العالمي السابق فالكيك بوكسينگ، دخل هذه المرة حلبة الانتخابات بالليگا ديال حزب الحركة الديمقراطية الاجتماعية، وهو وكيل لائحة الحزب يصفرو، بعدما ترأس جماعة ايموزار كندر خلال الخمس سنوات الماضية بالليگا ديال حزب الحركة الشعبية.

الانتخابات التشريعية 2026، كاتعرف ايضا مشاركة نائب رئيس الجامعة الملكية المغربية لكرة القدم ورئيس عصبة الدار البيضاء الكبرى لكرة القدم، محمد جودار الأمين العام لحزب الاتحاد الدستوري، واللي مرشح بدائرة بنمسيك بالدار البيضاء وراه معروف فهاد المقاطعة اللي ولف يترشح فيها.

وفكازا نيت، مرشح أنس محفوظ الرئيس الأسبق للرجاء الرياضي بدائرة الفداء مرس السلطان، باسم حزب الاتحاد الاشتراكي للقوات الشعبية، والرجا عندها شعبية كبيرة فدرب السلطان وهو معروف عند الرجاويين.

وديما فكازا، وهذه المرة فالبرنوصي، مرشح رئيس نادي الرشاد البرنوصي هشام شبورة كوكيل للائحة حزب الاتحاد الدستوري بدائرة سيدي البرنوصي، بعدما كان مع التجمع الوطني للأحرار فالانتخابات ديالو 2021.

والى الجهة الشرقية، وبالضبط مدينة بركان، داخل رئيس النهضة البركانية حكيم بنعبد الله الانتخابات التشريعية 2026، كوكيل للائحة حزب الاستقلال فبركان.