گود سبور//

مشى لويس دي لافونتين مدرب المنتخب الإسباني، لسبتة المحتلة ودار فيها زيارة للمدينة وهضر مع سكانها، كتعبير منو على دعمو لمهم بسبب أزمة الهجرة اللي كتعرفها المدينة هادي أسابيع.

لويس دي لافوينتي استقبلو خوان جيسوس فيفافس رئيس مدينة سبتة اللي عندها حكم ذاتي من إسبانيا، وقال المدرب الإسباني فكلمة له نشرتها وسائل الإعلام الإسبانية اليوم الجمعة: “اليوم يوم كايحسسني بالتأثر والفخر والامتنان، حيث عطيتوني فرصة نكون معكم فهاد الظروف الصعبة اللي كاتدوز منها المدينة، وكانعبر لكم على دعم وتشجيع بلد كاملة، إسبانيا كاملة، حنا واقفين معكم ومتضامنين معكم”.

وهضر دي لافوينتي على الحوايج الزونين اللي كاتبارطاجيهم الكورة وقال إن سكان سبتة ولاو قدوة بطريقة تعاملهم مع أزمة الهجرة، وقال: “الكورة هي مدرسة ديال القيم بحال التضحية والتضامن وهذا الشي اللي كانحاول ديما نسلط عليه الضو فيها، وراكم وليتو قدوة حيث بينتو قوة وعطيتو مثل يحتذى به لإسبانيا كلها”.