محمد سقراط-كود///
ديما فين مايكون شي نشاط عندو علاقة بالأمازيغ، كيخرجوا شي وحدين مرددين داك اللازمة ديال، آش درتوا للأمازيغ في الجبال كيموتوا بالبرد، علاش ماتفكرتوش أمازيغ الحوز، شنو غادي يزيد هادشي لأمازيغ صنهاجة السراير، على أساس أن الأمازيغ كاينين غير في الجبل كيعانيو ديما من الفقر وقلة شي وكيموتوا بالبرد والجوع، وعلى أساس هادو لي في الوطى ماشي أمازيغ جايين مباشرة من قريش سكنوا سهول المغرب وخلاه الأمازيغ حاصلين في الجبال، خاص شي وحدين يعرفوا أن أعظم الإمبراطوريات لي دازت في المغرب وشمال افريقيا والجزيرة الإيبيرية راها ديال الأمازيغ وخرجات من الجبل حرفيا، إقليم الحوز بالظبط راه منو جاو المحدين واحتلوا شمال افريقيا كامل والأندلس، ومن الفيافي قرب واحة فيكيك جاو المرينيين، ومن الصحرا جاو الأمازيغ المرابطين، راهم ديما كانوا في الجبل والخلا والفيافي وقدروا يتغلبوا على هادشي، في المقابل واحد في كاريان أو حي هامشي في كازا أو باقي مدن وسط المغرب، كيحس بأفضلية البراكة على دار وأرض فلاحية وأشجار مثمرة ومعزيات، وشي تقاعد من فرنسا وبنادم عايش مرتاح في داك راس الجبل، ولاخر عاد وصلوا الواد الحار ول لبارح حاس براسو بحال الى جار الملايرية في عين الذياب.
معرفتش شكون لي قنع المغاربة بلي الأمازيغ كاينين غير في راس الجبل معزولين مهمشين معندهم والو، بينما أن المغاربة لي في الوطى عايشين بحبوحة العيش مخاصهم حتى خير، راه الرحامنة بلادي كلها وطى فيها غا الحجر والعقارب والحرمل والحجة والجفاف، راه حتى عين بني مطهر جات في الوطى وسيد المختار جا في الوطى، وشكون لي قنع المغاربة أن برطمة ديال الإستفادة لصحب دور الصفيح، حسن من دار بلدية في ويرغان أو أيت سدرات العليا و السفلى أو أغبالة أو القباب، فاش كتسمعهم كيهدرو يجيب ليك الله ساكنين في المدينة المالية لأنفا، وبنادم ساكن من مور الشمس خاصوا يركب في جوج طاكسيات وطوبيس وخطاف وكرويلة مركبين ليها عود واكل الزيبام باش يوصل لدارو، وحتى هو كيبدى هدرتوا إخواننا الأمازيغ كيعانيو في راس الجبل، وعلا شنتا مكتعانيش في سفح نفس الجبل.
هاد النقاش ديال أنا أمازيغي أنا عربي لي غادي يحسموا هو تحاليل الحمض النووي وخاص الدولة تفتح لينا شي مختبر هنا وحنا مستاعدين نخلصوا باش نعرفوا أصلنا بصح منين، واخا راه باين أننا من هنا في الأصل وتخلطنا مع أجناس أخرى بحال كاع البشر، باش نيت نساليو من هاد الأسطورة ديال أن المغرب ساكنته لي في راس الجبل أمازيغ ولي في السهول الفلاحية الخضراء والجرداء عرب وهم أفضل حالا من سكان الجبال غير حيت ساكنين في الوطى، بنادم كيهدر بحال إلى عندو أراضي الحاج الكرافص في الوطى، آش عندك في داك الوطى باش تشوف راسك حسن من سكان الجبال وتعاطف معاهم، وتمارس عليهم الشفقة؟، منطق عجيب عند شي وحدين المهم عندهم هو يبخسوا أي يوم فرحة أمازيغي مغربي قح.