سهام البارودي- كود

—

يكفي أنه تصب عندنا شوية ديال الشتا باش نغرقو و فاش كانغرقو ضروري يبانو واحد الناس لي اختصاصيين فالشكاوي من الفيضانات صحاب ! آه لاواه البنية التحتية ! آ لاواه ليديك ديگاج ! آه لاواه لونيي ديگاج ! ايوا ؟ و المواطن الموسخ لي كايلوح الزبل و كايبوشي القوادس مايديگاجيش؟
وي كاينين مشاكل فالبنية التحتية ! و كاينين أحياء القوادس ديالهم مامجهزينش باش يستقبلو كمية كبيرة من الأمطار ! و بصح خاص المكتب الوطني للماء و الكهرباء و لا الموزعين ديالو يتحملو مسؤوليتهم فاش يكون شي فيضان و ذلك عبر التخطيط القبلي و الاصلاح و تأهيل قنوات الواد الحار ! و حتى لاقدر الله  و وقع فيضان كيما شفنا فبزاف ديال الأحياء فكازا خاص ليديك و لا لوني يدخلو و يحلو المشكل و يسرحو القوادس دغيا باش المواطن مايلقاش راسو مبلوكي فالطرقان ! و لا فايضة عليه الدار ! و لا واحلة ليه الطوموبيل وسط شي گلتة، حيت فالفاكتورة ديال الما لي كاتوصلنا من ليديك و لا لوني كانخلصو واحد الحاجة سميتها لاسينيسمو ( الواد الحار).
و لكن ! المسؤولية ديال خنيق القوادس ماكاتحملهاش غير لاليديك و لا لوني ؟ المسؤولية كايتحملها حتى داك المواطن بوخنونة لي كايلوح الزبل فين ماوالاه و كايبوشي القوادس ! المسؤولية كايتحملوها دوك الفراشا ديال شارع محمد الخامس لي كايساليو النهار و كايخليو الكراطن و البلاستيكات و الزبل ملاوح !