گود سبور//

تأهل ريال مدريد الإسباني لدومي فينال دوري ابطال أوروبا، بعدما ربحو اليوم مانشستر سيتي النگليزي فتيران الاتحاد فالنگليز، فروتور ربع النهائي.

وسالا الوقت الأصلي من ماتش ريال مدريد ومانشستر سيتي بالتعادل الايجابي واحد لواحد، وماركاو الريال هما الاولين بواسطة رودريگو فالدقيقة 12، وضربو مان سيتي التعادل عن طريق كيفن دي بروين فالدقيقة 76، وكان النجم المغربي براهيم دياز احتياطي مع الريال وما دخل حتى للدقيقة 84، وبعدما خرجو الفراقي بجوج معادلين مشاو لعبو الأشواط الإضافية اللي سالات حتى هي بالتعادل واحد لواحد، ومن وراها لعبو البلانتيات اللي ريحوهم ريال مدريد بنتيجة 3 لواحد.

وبهاد النتيجة تاهلو ريال مدريد وغيلعبو فالدومي فينال مع بايرن ميونخ الالماني فريق المغربي نصير مزراوي، اللي تأهلو بعدما ربحو أرسنال النگليري فروتور ربع النهائي بواحد لزيرو ماركاه جوشو كيميش فالدقيقة 63، ولعب مزواري أساسي حتى للدقيقة 76 وخرج، وتكاليفاو بايرن ميونخ بمجموع نتيجة الألي والروتور 3 لجوج.

وحاضر المغرب فدومي فينال دوري أبطال أوروبا لكرة القدم اللي هي أهم بطولة ديال الاندية فالعالم، بثلاثة ديال اللاعبين مغاربة، هم أشرف حكيمي اللي تأهل البارح الثلاثاء مع باريس سان جرمان الفرنسي وغيلعبو ضد بروسيا دورتموند الالماني، وبراهيم دياز مع ريال مدريد الإسباني اللي غيلعبو ضد نصير مزراوي وبايرن ميونيخ الالماني.