كود سبور//

قرب يرجع الدولي المغربي ابراهيم دياز يلعب مع ريال مدريد الإسباني والمنتخب الوطني المغربي، بعدما غاب على الماتشات الأخيرة ديالهم بجوج بسبب الإصابة اللي كانت جاتو قبل أسابيع فماتش ريال مدريد وريال سوسيداد، ولكن واخا دغيا بدا كايبرا عكس ما كان منتظر، من الصعب يشارك فالكلاسيكو ضد البارصا مع نهاية شهر أكتوبر الحالي.

وحسب جريدة “ريليفو” الإسبانية، فمشاركة ابراهيم دياز مع ريال مدريد فالكلاسيكو ضد البارسا يوم 26 أكتوبر الجاري، بحال شي حلم وصعيبة، بالرغم من أن اللاعب تفاعل بشكل إيجابي مع العلاج وبدا كايبرا بسرعة عكس ما كان متوقع فالأول ملي كانت تشير التوقعات إلى أنه ما غايبرا حتى تدوز شهرين على الأقل.

نفس المصدر، كشف أن ابراهيم دياز غايكون واجد باش يلعب نهار 2 نونبر الجاي فالماتش ديال ريال مدريد ضد فالنسيا ضمن منافسات بطولة الصبليون، وأن هذا الموعد كايبقى واقعي، مع العلم أنه غايخرج من العيادة الطبية ديال الفريق بحذر وغير بشويا لتفادي أي نتائج عكسية.

للإشارة فالمنتخب الوطني المغربي، عندو 2 ماتشات ضمن إقصائيات كأس إفريقيا 2025، ضد كل من الگابون فالگابون يوم 11 نوفمبر وضد منتخب ليسوتو فالمغرب يوم 19 من نفس الشهر، وبالتالي وحسب تقرير الجريدة الإسبانية فابراهيم دياز غايكون متاح باش يلعب مع الأسود فهاد الجوج ماتشات.