كود سبور//

قرب الدولي المغربي براهيم دياز، يرجع يلعب مع الفريق ديالو ريال مدريد الإسباني، بعدما غاب عليه خلال الأسابيع بسبب الاصابة.

ورجع براهيم دياز، اليوم الاثنين، للتداريب الجماعية ديال ريال مدريد، وتدرب بشكل عادي مع المجموعة، بعدما كان كايتريني الايام اللي فاتت غير بوحدو، وهذا الشي قبل موعد الملاسيكو ضد البارصا السبت الجاي فبطولة الصبليون.

وكلشي كايتسنى الرجوع ديال براهيم دياز، سوا جماهير ريال مدريد أو الجماهير المغربية، حيث ما كانش حاضر فالتوقف الدولي الأخير مع الأسود، وجا تفرج فيه غير من المدرجات ضد أفريقيا الوسطى فتيران وجدة برسم اقصائيات كاس أفريقيا.

وكان براهيم دياز توعت قبل شهر من دابا فماتش ديال ريال مدريد ضد ريال سوسيداد فبطولة الصبليون، وكانت التقارير الطبية كاتوقع أنه ما غايقدر يبرأ حتى دوز شهرين على الاقل ولكن اللاعب جسم اللاعب تفاعل بشكل إيجابي مع العلاج وقدر يبدا يرجع دغيا.