كود سبور//

أكد الدولي المغربي ابراهيم دياز نجم ريال مدريد الإسباني، أنه اختار المنتخب المغربي بالقلب ديالو حيث كايبغي المغرب، وشكر الملك محمد السادس والشعب المغربي على الحب اللي عطاوه له، وقال أنه باغي يحقق الألقاب على قبلهم كهدية لهم على حبهم له، وأولها كأس إفريقيا 2025، وأنه باغي يربح الكورة الذهبية الافريقية باش يكون أول لاعب من ريال مدريد كايربحها.

وهضر ابراهيم دياز فحوار مع bein sports وقال: “اختاريت المغرب بقلبي، وأنا ممتن للملك محمد السادس وللشعب المغربي للحب اللي حسيت به وباغي نحقق بزاف ديال الإنجازات ونربح الألقاب مع بلادي ونربح لقب مع المنتخب المغربي ونهديه لكل المغاربة وهذا الشي غير كنفكر فيه كنحس بالتبوريشا”.

وكمل ابراهيم دياز: “بغيت نرجع هذا الحب اللي عطاوني المغاربة ونهدي لهم لقب، وباغي نربح كاس أفريقيا 2025 فالمغرب على أرضنا، ومن وراها نربحو المزيد من الألقاب”.

ووضح دياز: “المغرب ديما كان عنود أجيال رائعة من اللاعبين ولكن دابا كندويو على جيل حقق إنجاز واعر فمونديال 2022 وكايقدم مستوى واعر وبغينا نكملو فنفس النيفو والتأهل إلى كأس العالم ولى شي حاجة عادية والوصول للدومي فينال والفينال حتى هو ودابا هدفنا نبقاو نربحو ونحققو البطولات الكبرى”.

وزاد نجم ريال مدريد وقال: “أول حاجة كنفكر فيها هي نربح الألقاب مع المنتخب المغربي، وباغي نكون أول لاعب من ريال مدريد كايربح الكورة الذهبية الإفريقية علاش لا؟ ولكن الأول هو الأهداف الجماعية عاد نفكر فالأهداف الفردية وباغي نقدم احسن ما عندي مع المنتخب المغربي باش نحقق الجوائز الفردية حيث بدون المجموعة مستحيل تحقق الجوائز الفردية ودابا عندنا مجموعة زوينة فريال مدريد وفالمنتخب المغربي”.