گود كازا//

حطات شركة “صونارجيس” المكلفة بتدبير مركب محمد الخامس، راسها فـ موقف صعيب بزاف، ملي راسلت الرجاء والوداد الرياضيين وجماعة الدار البيضاء على غفلة الجمعة وقالت لهم سطاد دونور غايتسد 6 السيمانات.

وحسب مصادر مطلعة، غادي يكون اجتماع بين سلطات وجماعة الدار البيضاء وممثلين الرجا والوداد مع “صونارجيس”، وكاين احتمال كبير تأجيل إغلاق الملعب حتى يسالي شهر أكتوبر، وراه المسؤولين ديال الأندية ما راضييش بجوج على هذا الشي وحتى الجماعة وكايضغطو لتأجيل القرار.

وديما وفي نفس السياق، اكد عبد اللطيف الناصري نائب عمدة الدار البيضاء، ان إغلاق مركب محمد الخامس ماشي شأن خاص بشركة “صونارجيس” المسؤولة على تدبير التيران حتى تتخذو بشكل منفرد، ولكن راه قرار بالغ الأهمية وخاص الرجوع فيه وفـ التوقيت ديالو لگاع الشركاء والمتدخلين.

راسلت “صونارجيس” جماعة الدار البيضاء وقالت لهم ان ستاد دورنور غادي يتسد ما بين 15 اكتوبر و 30 نوفمبر حسب ما أكد نائب عمدة الدار البيضاء أن الجماعة توصلت به، لصيانة عشب الملعب استعداداً لكاس أفريقيا 2025.