وكالات//

محكمة فمدينة كانو اللي فشمال نيجيريا خرجات بحكم غريب بزاف وماعندو معنى، وهو أنها فرضات على جوج ديال المؤثرين فـ “تيك توك” يتزوجو فمدة ما تفوتش ستين يوم، من بعد ما دارو البوز بزاف فبلادهم بفيديوهات شافتهم السلطات الشرعية الداعشية فـ كانو على أنهم فيهم قلة الحيا ومخالفة للتقاليد.

القضية بدات مع مؤثر معروف سميتو “إدريس ماي ووشيريا”، اللي بان فـ فيديوهات وهو كيبوس وكيعنّق مؤثرة نيجيرية قصيرة القامة سميتها “باسيرا يار غودا”. البث المباشر نواو بهم غير الترفيه وجلب التفاعل، ولكن الأمور خرجات على السيطرة منين تدخلات شرطة الشريعة الإسلامية اللي كيسمّيوها “هيئة الحسبة”، واتهماتهم بنشر محتوى لا أخلاقي وما كيليقش بمجتمع محافظ (زعما مدعشش) بحال كانو.

وحسب الصحافة النيجيرية، باسيرا فالأول ما عجبهاش الحال وما بغاتش الزواج الإجباري، ولكن قالت ما عندهاش مشكل فالزواج إلى إدريس وفر ليها دار ملك ماشي كراء، باش تضمن مستقبلها ومستقبل ولادها اللي ممكن يجيّو. هاد الشرط صدّم المتابعين ديالهم، كاينين اللي شافوه موقف مضحك وغريب، وكاينين اللي قالو بالعكس، هادي بنت واعية بحقوقها فظروف قانونية ماشي عادية.

ودابا، مع اقتراب نهاية المهلة اللي عطاتهم المحكمة، بداو التحضيرات ديال اللي سموه الناس “أكثر عرس مثير للجدل فنيجيريا”، بحيث بان المؤثرين فـ فيديوهات جديدة كيوضحو أنهم فعلاً كيستعدّو للعرس.

زيرو حرية، زيرو حق، زيرو خيار، زيرو كولشي.. هذا هو حال الدول اللي فيها شرطة اسلامية!