محمد سقراط-كود///

بقدر مكتبان الدولة المغربية مبهرة في معالجة العديد من الأخطار والكوارث بشكل فيه بزاف ديال الكفاءة والفعالية، بحال محاربة الإرهاب والخلايا الجهادية وصحاب الفكر المتطرف، بقدر مكتبان عاجزة على محاربة ظواهر تقل خطورة على الإرهاب، لكنها في نفس الوقت مدمرة وضحاياها كثار، وكتقيس الهيبة ديال البلاد وأمنها الوطني، تقريبا يوميا فين مانخرج ضروري نشوف شي كسيدة ديال موطور، أو شي برهوش صايك موطور وكيخيط وكيدوز من حدا البوليس طاير وهوما كيشوفوا فيه شبه عاجزين، طبعا البوليسي ديال تنظيم المرور ماغاديش يضحي بحياتو ويتعرض لمراهق جاي طاير بموطور شينوا كيقلب غير معامن يجيب الربحة، ولكن راه ضروري من محاربة هاد الظاهرة، مايمكنش تبقى القضية سايبة لهاد الدرجة.

حقا موطورات الشينوا راه فكو العزلة على ملايين المغاربة في القرى والبوادي وحتى في المدن، كانوا كيعانيو من وسائل النقل العمومية لي صعيب تعول عليها وفي مدن كثيرة راها شبه منعدمة وحتى إلى كانت راها لا إنسانية، أجيو دابا نيت شوفوا طوبيسات فاس راه جريمة كترتاكب في حق الساكنة يوميا، لذا موطورات الشينوا حلو العديد من المشاكل وخلقوا فرص عمل كثيرة وساهموا في الاقتصاد الوطني، وكاين مغاربة كثار راه عتقهم من التجلويق في الطوبيسات، شوف دابا أي شانطي ديال البني مثلا كتلقى قبالتو خمسة ستة دالماطر ديال العمال لي خدامين فيه كل واحد منين جاي ورابحين الوقت ديال التنقل، ولي حتاج شي لعيبة كيخطف يجيبها بالزربة، في نواحي الحوز فين ضرب الزلزال كنت شفت معلمة عندها موطور شينوا كتضرب بيه الطريق يوميا في الجبال باش توصل للمدرسة فين كتقري نواحي ويرغان لفوق في راس الجبل، ولكن في المقابل راه أغلب الشفارة حاليا هادي هي وسيلتهم في التنقل من أجل السرقة، وفين مكنتي كيوصلوا حتى لعندك ومخلاو حتى شي قنت آمن.

مليلية أرض مغربية خاضعة للإدارة الإسبانية في الباب ديالها غادي يبان ليك المواطن المغربي جاي راكب بشكليط أو موطور ومعلق الكاسك ديالو حتى كيوصل للديوانة وكيديرو فوق راسو عاد كيدخل لمليلية لي واخا هاجمين عليها القاصرين وخالقين بعض مظاهر الجريمة، ولكن عموما المغربي فيها كيحتارم القانون، وهو نيت فاش كيخرج من مليلية مكيبقاش يحتارم القانون، إذن راه الموشكيل ماشي في المواطن بل في آليات تنفيذ القانون، دابا غادي تخرج لأي شارع غادي يبانوا ليك براهش صايكين ماطر دالشينوا بلا كاسكات طالعين فوق الطروطوار دايزين أنتيردي شادين ليمن ليسر حارقين الضو، مكابريين دايرين الفوضى وخارجين على القانون، طبعا فاش غادي تشوف هاد المظاهر غادي تقول مع راسك فيناهو الأمن فيناهو المخزن آش هاد السيبة، راه اليابان عرفات ظاهرة ديال عصابات أصحاب الدراجات بوسوزوكو لي كانوا منظمين وعنيفين بزاف، ومع ذلك فاش بغات الدولة تسحقهم راه دغية سالات معاهم بوضع قوانين صارمة وتطبيقها، راه غير معقول تبقى البلاد ساحة ديال معركة يقودها شباب وبراهش وجانحين صغار ضد القانون باستعمال ماطر الشينوا.