كود كازا //

علمت “كود” ان الصحافي ومقدم نشرات الاخبار بالفرنسية سابقا وديع دادا قد استقال اليوم لاربعا 5 فبراير 2025 من القناة الثانية بعد 19 عام من الخدمة. استقالة جات بعد 3 اشهر من قرارات غبية دارتها الادارة ضد هاد الصحافي٬ بعد ما تم منعو من تقديم نشرات الاخبار واعفاؤو من رئاسة التحرير بمديرية الاخبار اللي كيشرف عليها حميد ساعدني اللي خدا التقاعد ديالو وزادوه بحال ديك القناة ما فيها حتى حد يحمر الصرف.

وديع دادا ختار هاد اليوم ماشي غير اعتباط. هاد النهار فرض مدير مديرية الاخبار اللي فات سن التقاعد على مقدمي وصحافيي القناة يديرو الشارة الحمرا فاشارة الى خوض الاضراب العام اللي دعات ليه نقابتو الاتحاد المغربي للشغل.

مصادر من “كود” كتهدر على جو موبوء فمديرية الاخبار وباللي التسيب وصل لمداه فهاد القناة اللي كانت منارة للمهنية فالمغرب وفيها طاقات واعرة كتاكل لعصا ومهمشة.

وديع دادا فضل كرامتو وحريتو. رفض يقبل الرداءة تتحكم فيه وتسيرو وتفرض عليه اش يدير.