عمر المزين – كود//

اش شافو لمغاربة فالنهار الاول فرمضان. هاد الشهر راه شهر حرب كبيرة على شكون يربح نسب المشاهدة. حسب معطيات فهاد الشي دارتها “دوزيم” فبيان، فالقنوات المغربية “من دوزيم” حتى “الاولى” و”الامازيغية” و”السادسة” …. حصلات على 70.4 بالمائة من حصة المشاهدة مقارنة ب70 بالمائة العام اللي فات

دوزيم ربحات الاولى فهاد المعركة. كنهدرو على النهار الاول. “دوزيم” خذات 42.4 بالمائة نسبة مشاهدة فالذروة وتزادت كثر من6.4 بالمائة مقارنة بالعام اللي فات. “دوزيم” شافوها على مدار اليوم 31.8 بالمائة وحتى هي كانت فيها زيادة ب1.8 بالمائة مقارنة ب2025.

ولكن شكون تشاف بزاف. حسب البيان، ف”بنات لالة منانة” شافوها 12 مليون و142 الف مغربي فالحلقة الاولة من الجزء الثالث من هاد السلسلة. هاد الرقم كيمثل 47.8% من حصة المشاهدة).

دابا ما كنهدروش على واش السلسلة او العمل مزيان ولا اللا واش مقاد ولا اللا. كنهدرو على نسبة مشاهدة. فسلسلة “يوميات محجوبة والتيبارية” شافوها 10 مليون و372 الف مغربي فالنهار الاول وهو كيمثل 49.6 فالمائة من نسبة المشاهدة.

اما “حكايات شامة”فشافها 9,983,000 مشاهد. هاد الرقم كيمثل 37% من نسبة المشاهدة. وراه جا “هاديك حياتي” الذي شافها 8,658,000 شخص اي 41%.

حتى فالجزء الثاني من السهرة حيحات دوزيم. ف”ليلي طويل” شافوه 5 مليون و845 الف مشاهد وكيمثل 27.8 بالمائة من حصة المشاهدة.

دوزيم قالت باللي مجالها الرقمي كان عليه اقبال كبير. منصاتها جابت 8 مليون مشاهدة ف14 ساعة