كود علي الصافي ///

افادت يومية “الصباح” باللي مطعم فخم فحي الرياض فالرباط تحول لمحج شبه يومي لاعضاء وعضوات ديوان احد المسؤولين الحكوميين. الجريدة قالت باللي بعض المرات كيحضر معاهم الكاتب العام وباللي هادو يزردون على حساب المال العام ويقفلون راجعين الى منازلهم او مكاتبهم”.

حسب ما علمته “كود” فالامر يتعلق بديوان وزيرة السكنى والتعمير وسياسة المدينة فاطمة الزهرا المنصوري “بنت الباشا”.

وحسب مصادر “كود” فالمطعم المعني هو “لاكوتشارا” وكيكون فيه مديرة الديوان ديال بنت الباشا سلمى بنزبير اللي رقاتها الوزيرة هادي سيمانا وتهلات فيها وعطاتها منصب اخر هو “مديرة عامة لمؤسسة الأعمال الاجتماعية لوزارة إعداد التراب الوطني والتعمير والإسكان وسياسة المدينة”. وكيحضر للزرود مستشار الوزيرة البامي هشام عيروط بالاضافة الي الكاتب العام للوزارة يوسف الحسني.

حسب مصادر “كود” ماشي غير مستشاري بنت الباشا اللي كيجربو ياكلو فالريسطو الزوينين فحتى مستشاري وزير الثقافة والشباب والاتصال ما كيعجبهم ياكلو غير فالريسطو الرباطية الشهيرة اللي حدا البرلمان “لاماما”. ديما كيتجمعو هاد المساعدين ديال بنسعيد فيها.

دابا هاد المستشارين الضاصرين بزاف واللي غالبيتهم ضعيف فالتكوين عايشين حياة البدخ. نهار شي حد ينتاقدهم يطلقو عليه الذباب الالكتروني اللي مكلفة بيه شركات كتخلص من المال العام.