كود الرباط//

كتعيش عدد من الجماعات القروية بإقليم القنيطرة، على وقع تهميش كبير بسبب ضعف المنتخبين لي مقابلين مصالحهم والفيرمات ديالهم، وفي ظل وجود عامل الإقليم “ممسوقش” لسكان هاد الجماعات.

سكان بعض المناطق فهاد الجماعات،  خصوصا جوج دواوير بجماعة البحارة اولاد عياد قيادة أولاد مصباح، لي فيها تقريبا ساكنة تقدر بـ800 دار، معندهمش الضو، مقطوع عليها هادي كثر من 20 يوم.

وحسب تصريح من أحد السكان، توصلت به “كود”، فراه رؤساء الجماعات والمنتخبين متسوقوش ليهم، ناس عايشين فالعطش والفلاحة متضررين والحوانت مكرفصة.

وقال أحد السكان وفق التسجيل الصوتي لـ”كود” :”الناس ضعاف والحالة صعيبة والفلاحة تضررات”.

الغريب فالفيلم ديال الضو تقطع على 800 دار، وفمناطق معروف حاكمها بلعسال الشاوي، البرلماني  عن الاتحاد الدستوري ورئيس جماعة مولاي بوسلهام، بحيث اغلب رؤساء الجماعات فهاد المناطق تابعين له. بحال الراضي فسيدي سليمان.

واش هاد القضية غادي تفيق عامل اقليم قنيطرة ويتحرك ويحارب هاد المنتخبين لي مدايرينش خدمتهم ومخلين 800 أسرة بلا كهرباء مع الدخول المدرسي ومع الدخول الفلاحي بحيث هاد المناطق معروفة بالفلاحة ومكاينش شي فلاحة بلا ضو وبلا ماء. ولا حتى هاد العامل خصو محاسبة على عدم تفعيل دور المراقبة.