سهام البارودي – كود//
دنيا بطمة موهبة خارقة و صوت مايمكنش يختالفو فيه الناس، و أنا شخصيا فان كبيرة ديال دنيا بطمة و تبعتها من البدايات ديالها و تبعت حتى الحملات لي دّارت عليها مورا مانجحات فعرب آيدل و بصّح دنيا تعرضات لبزاف ديال التنمر و بزّاف ديال الحگرة فالبدايات و بنادم مقابل وجها و سنانها و فورمتها و زكها و حتى مؤخرا قبل ماتشّد تعرضات لحملات اعلامية شرسة، بواحد الشكل ماعندو تا علاقة بالمهنية اكثر ما عندو علاقة بتصفية حسابات لي كانت مفروشة …
و دنيا شخصيا، شخصية زوينة و مرحة و “ضحّوكية”، ديك صاحبتك لي تقدري تخراي معاها بالضحك و ممتعة فالجلسة ديالها و هادشي كان كايبان فالحوارات ديالها لي دارتهم فالتلفزة المغربية و لي استمتعنا بيهم و معاهم.
Cela dit
خلاوها الگور
دنيا اليوم هي ظاهرة، ظاهرة ديال كيفاش “الجهل” يقدر يخرج على الموهبة ديال الانسان و يقودها عليها، من الأول، من الاختيارات الشخصية و الفنية لي بدات بيها كان باين بلي دنيا عندها اونتوراج حقير جدا ماعمرو غايدفعها للقدام، حيت دنيا الصوت ديالها ماشي صوت ديال العراسات و الكاباريهات (فقط) دنيا بالصوت و الموهبة لي عندها فهاد الوقت كان خاصها تكون خرجات شي ستة و لا عشرة ديال الألبومات ديالها بسميتها بأغانيها بألحانها بكلماتها بالدارجة و بالخليجية و بالمصرية فحال سعد المجرد فحال اسماء المنور و فنانين و فنانات لي عندهم موهبة كبيرة.
دنيا كان نورمالمون خاصها تكون دارت شي ديو مع شي فنان عربي كبير و لا شي فنان عالمي كبير گاع
دنيا كون عندها العقل و كون لونتوراج ديالها “دار ليها العقل” و بالموهبة لي عندها كان خاصها تكون مستفة شي ستة و لا سبعة ديال الجوائز و اكثر فالصالون ديال دارها كانت ممكن تكون دابا تكون رابحة الموريكس دور و لا الميدل ايست ميوزيك اوارد و لا جوائز دولية فحال الام تيفي يوروب ميوزيك اوارد فئة افضل فنان فالشرق الاوسط كيما فاز بيها سعد المجرد …
و زيد انها “الصورة التجارية” ديالها كان نورمالمو نورمالمو كون كانت “بعقلها” كوراها كاتربح الزبابل ديال الفلوس من الاشهار، كوراها اليوم الوجه الاعلاني ديال شي ماركة كبيرة ديال الروايح و لا المودا، راه نانسي عجرم هي الوجه الاعلاني ديال Hublot و شحال هادي كانت سانية كونطرا مع كوكا … و فنانات اخرين بزاف لي الموهبة ديالهم تقدر تكون اقل بكثير من الموهبة ديال دنيا بطمة و لكن حيت ذكيات و حيت دايرين بناس اذكياء عرفو كيفاش يجيريو الكاريير الفنية ديالهم و يخرجو منها گاع الفرص الممكنة.
هادشي كامل و اكثر كان ممكن دّيرو دنيا كون ماكانتش “جاهلة” و ماغانقولش قارية حيت القراية فيها و فيها و كاين فنانين كبار ماعندهمش باك بليس سانك و لكن عندهم الثقافة الكافية باش يعرفو يهضرو و يتعاملو مع الاعلام و يخدمو على الصورة ديالهم.
انا بعدا كون كانت دنيا صاحبتي و لا ختي كنت غانصحها تشد شي مستشار تواصل و لا فريق تواصل مزيان يخدم معاها على الصورة ديالها و يوريها و يقريها شنو كايتقال و شنو ماكايتقالش و شنو كايدار و شنو ماكايدارش و يعاونها تخدم على الصورة ديالها، راه تبارك الله الفلوس موجودة و احسن استثمار يمكن ليها ديرو ماشي هوا الديور و الفيلات و الطلامط ، احسن استثمار هوا تستثمر فراسها و فالكاريير ديالها و ديك الساعة غادير احسن ديور و احسن فيلات و احسن طلامط ! فنانين كبار فالعالم العربي و فالعالم بصفة عامة عندهم مستشارين اعلامين و كايخدمو مع مانادجيرات كايحمرو الوجه فحال ليدي گاگا، بيونصي، ريهانا، تايلر سويفت… نجوى كرم، نانسي عجرم…
سيري آختي راه صوتك زوين وي و لكن عقليتك خاصها اعادة توزيع ماشي موسيقيا و لكن تربويا.
