كود -سبور //

واش كريستيانو رونالدو بكى ولا لا؟ هاد السؤال وراه تقميرة كتوصل حتى ل 90 مليون دولار على منصة Polymarket

الناس اللي قمرو صرفو ملايين الدولارات، وكل واحد فيهم بدا كيقلب فالتاريخ ديال رونالدو مع الدموع ، النجم البرتغالي سبق وبكى أكثر من مرة، سواء ملي خسر مع المنتخب أو حتى ملي ربح الألقاب، داكشي علاش كانت نسبة كبيرة من القمار  مقتانعين أنه غادي يبكي مرة أخرى فالمونديال.

من بعد ماتش البرتغال ضد إسبانيا، اللي خسرات فيه  البرتغال بواحد لزيرو، رونالدو خرج من التيران باين عليه التأثر، ولكن السؤال اللي بقى مطروح هو: واش كانت فعلاً دموع ولا غير تأثر؟

حسب القواعد ديال منصة Polymarket، البكا كيتحسب غير إلا كانت الدموع باينة فالوجه فشي صورة أو فيديو، من بعد الماتش بداو الباحثين  كيدققو فالصور والفيديوهات لقطة بلقطة، خصوصاً الصور اللي نشرت وكالة Getty، واللي كتبين باللي رونالدو بكى.

وفالأخير، رجعات المنصة الأدلة اللي عندها، وقررت أن رونالدو فعلاً طيح الدموع، هاد القرار خلا ناس يربحو ملايين الدولارات، وناس آخرين يخسرو مبالغ كبيرة.

القرار خلق صداع كبير ، حيث المنصة قالت بلي اعتمدت على صور وفيديوهات كافية باش تثبت البكاء، ولكن رفضت تنشر هاد الأدلة للعموم ،وحسب مصدر مطلع، فالمنصة كتخاف إلا نشرت الأدلة يتهموها الناس بالتلاعب أو باستعمال الذكاء الاصطناعي، وهاد الشي يقدر يجر عليها مشاكل قانونية.