كود كازا//

الصدمة كانت كبيرة لاسماء “حاكمة عين الدياب” فكازا اللي كانت دايرة قانونها فمطاعم “تشيلو” و”ڤيراندا”. كانت قرارات الهدم وجات الطراكس البارح الاثنين 27 اكتوبر 2025 وحيدات بناء “غير قانوني”. هاد الشي نشرناه البارح فيديوات وصور، لكن من قوة الصدمة بسباب الوهم اللي ركبها وولات كتحس براسها فوق القانون ومحمية من قبل سمسار طاشرون كيخدم بالصحافة وشي وحدين خراين. حسب ما علمته “كود” فهاد السيدة ما قدراتش ما قدراتش تتحمل الصدمة وماكانتش كتصور بللي غا يدور الزمان ويتخلاو عليها هادوك للي كانو كيحميوها وللي اليوم كيشوفوها بحال شي حاجة مشبوهة خاصهوم يتفكو منها. إوا الوقت راها تبدلات والدولة فعلا باغية تقتالع بؤر الفساد والريع وتنقي كورنيش عين الدياب من الحكام للي كانو فارضين فيه قانون الغاب والفساد.

“حاكمة عين الدياب” انتهى بها المطاف، حسب مصادر، في مصحة خاصة بالدار البيضاء وكانت بغات تزيد تلعب دور الضحية فهاد البيعة وشرية.

الفيلم ما وقفش هنا. حسب ما علمته “كود” فالتحقيقات اللي دارتها لجنة جات من الرباط تابعة للداخلية وتحقيقات اخرى، خلات الملف يوصل عند الفرقة الوطنية للبحث فهاد الفيلم كولو، منها تصريحاتها الغبية باللي جهات معادية للمغرب مستقرة بكندا في هذه القضية وأيضا تصريحاتها بارتباطها بشخصيات مرموقة في الإدارة الترابية والأمن والقضاء.

“حاكمة عين الدياب” بدا رحلة الصعود للهاوية. نتسناو تصريحاتها ونعرفو دور السمسار الطاشرون لمخبي فالصحافة اللي كان يحميها وتعطينا شكون دافع عليها.

تشرح لينا علاش خرجو قرارات ما تنفدوش فعهد العامل دادس اللي طار وجا فبلاصتو عامل جديد فانفا. عندها ما تقول فقضية كتبان بسيطة ولكن معقدة وممكن تكون بدية للقطع مع هاد النوع من الفساد

https://www.facebook.com/story.php?story_fbid=1234499682037525&id=100064325154145&mibextid=wwXIfr&rdid=rVLoPx5Qts7IlEsf&share_url=https%3A%2F%2Fwww.facebook.com%2Fshare%2Fv%2F1BZinNCX98%2F%3Fmibextid%3DwwXIfr