احمد الطيب كود الرباط//

حكم فشي شكل تحكم بيه على بنت وزير الفلاحة محمد الصديقي، خرج امس الثلاثاء 22 نونبر 2023، قاليك شهر سجنا موقوف التنفيذ وغرامة مالية قدرها 5 آلاف درهم، والتهمة السياقة في حالة سكر وحيازة مخدرات.

المحكمة الابتدائية ببركان، أمس الثلاثاء 21 نونبر الجاري، أدانت نجلة وزير الفلاحة والصيد البحري والتنمية القروية والمياه والغابات، بهاد التهمة، وكولشي هضر عليها وشهر بها فمواقع التواصل الاجتماعي.

تكون بنت وزير ولا غيرو، خاص تحمى حياتها الشخصية، وحتى هاد التهمة عجيبة بحيث إن استهلاك المخدرات راه واقع خاصو حلول اخرى وبزاف من شباب وشابات هاد الوقت كيتناولوه اما بسبب سن المراهقة واما باغين ينشطو واما بسبب البلية.

العقوبة ما عمرها كانت حل. وخاص حلول لمعالجة هاد الظاهرة وظواهر اخرى بحال الشيشة المنتشرة. دبا الحكم خرج فسياق النقاش على مشروع قانون العقوبات البديلة لي صوتت عليه الحكومة ومجلس النواب، واللي فيه نقاش مهم حول هاد الامور وكذلك مشروع القانون الجنائي لي غايتفح نقاش حول السكر العلني وغير العلني وغيرها. القضاء في بعض الاحيان كيدير احكام متأخرة عن واقع وتطور المجتمع .

وأخا تكون بنت وزير.. واش صافي سكرات ولقاو عندها شويا مخدرات تنغمات، راه كتبقا شابة بغات تعيش وتجرب كيف كيعيش اغلب بنات وولاد هاد الوقت. فكرو فحلول اخرى خليو الشباب ينشط ويعيش، فتحو اماكن كتحمي هاد الفئة ويلقاو ذواتهم وبدلو القانون الجنائي الاستعماري المتخلف اللي من عهد ليوطي متبدلش.

المشكلة فهاد القضية وهاد الشي الخطير كولو هو اقحام باها فهاد القضية حقاش وزير. اقحامو ماشي بريء. الهدف منو تشويهو فافق يجي التعديل الحكومي ويخرج من الحكومة. الوزير كان غادي يدان لو انو دخل واثر على القضاء وعلى القضية من ساعة وقوعها. لكن كيبان كون كانت بنت شي طاشرون ملايري كون تحلات مشكلتها فالساعة الاولى.

خاص تطبيق القانون ضد كل واحد خالفو. تطبيق القانون فيه عدم التشهير بيها وتشويهها فمواقع التواصل الاجتماعي. القانون خاصو يحميها. دابا هي تعرضات لجوج ادانات: القضاء والمجتمع. ومعاها استغلت لتصفية حسابات من شي وحدين ضد باها الوزير.