كود بني ملال ///

أثار قرار لمجلس جهة بني ملال خنيفرة خلال الدورة الاستثنائية للي تم العقد ديالها البارح الاثنين، واحد جدل كبير بين المنتخبين والساكنة والفرق الرياضية بالجهة.

هد القرار كيتعلق بمنح مجلس الجهة مبلغ مالي اضافي قدره 200 مليون سنتيم للجامعة الملكية لكرة القدم، في إطار اتفاقية بين الطرفين، ومن بعد ماكان المبلغ الأول مليار و200 مليون سنتيم، غايولي دبا المبلغ الاجمالي ديال الاتفاقية مليار و400 مليون سنتيم.

هذ القرار غضب بزاف الفرق الرياضية والساكنة، واستغربات من كيفاش جهة فقيرة وكتقول بلي عندها عجز فالميزانية، ومابقاتش كتعطي الدعم للفرق الرياضية كفرق كرة اليد، كتعطي اليوم دعم اضافي لجامعة عندها موارد مالية، وتزيدها مبلغ 200 مليون سنتيم فوق مليار و200 مليون سنتيم اخرى.

حتى عضوة وبرلمانية لي كتنتامي لنفس حزب رئيس الجهة عادل الباركات =البام= دارت تدخل واستغربات كيفاش كيتم اقصاء الفرق الرياضية من الدعم ماعدا فرق كرة القدم، في حين المجلس غادي يعطي للجامعة بمليار و400 مليون سنتيم.

سبق للوالي السابق الخطيب لهبيل نبه من العجز ديال الميزانية وقالها فدورة عادية ديال المجلس، وخاطب الرئيس البراكات باش يقلل من اغراق المجلس بالاتفاقيات لي ماكايناش الميزانية باش ينجزوها. من جهتها، بزاف ديال الفرق الرياضية وبينهم فريق كرة اليد بسوق السبت الفقيه بن صالح شكاو من الحرمان ديالهم من دعم الجهة واستغربو ان الرئيس البراكات قصاهم واخا عايشين ازمة مالية كبيرة