كود ـ سيدي رحال//

حي الشرف اللي كان معروف قبل لهيكلة ديالو بـ”دوار الشرفا” واللي تابع ترابيا لجماعة سيدي رحال الشاطئ، عرف عشية أمس الأحد 7 شتنبر 2025 مع الخمسة دالعشية، واحد لعملية ميدانية مزيانة، نفذوها عناصر الدرك الملكي بقيادة رئيس مركز سيدي رحال الشاطئ.

العملية على حساب ما وصل لـ”كود” من معلومات سالات بتوقيف ثلاثة أشخاص وسط دار مشبوهة، أما التهم اللي كا تطاردهم فهي الإتجار فالخمور والمخدرات وحبوب الهلوسة.

وخلال المداهمة، حجزات عناصر الدرك كميات كبيرة ومختلفة من الممنوعات:

824 قنينة ديال الخمور ما بين (روج، ويسكي، وبيرا)، 72 غرام ديال الشيرا، 26 غرام بودرة “دروك دير”، 43 غرام “بوفا”، 58 علبة سيليسيون، 6 حبات إكستازي، و36 حبة ريفوتريل..

مصادر “كود” كا تقول بلي هاد المحجوزات مجرد جزء ضئيل من الممنوعات اللي تمكنو المروجين باش يفرقوها بتزامن مع عطلة عيد المولد.

وزيادة على هاد الممنوعات، حجز الدرك الملكي بسيدي رحال مبلغ مالي مهم جاي من عائدات التجارة فالممنوعات، وكذا دراجة ثلاثية العجلات كتستعمل فالتوزيع.

العملية كانت تحت إشراف مباشر من رئيس مركز الدرك الملكي بسيدي رحال الشاطئ، وكتجي ضمن سلسلة من التدخلات الأمنية اللي كاتستهدف تضييق الخناق على شبكات المخدرات والمشروبات الكحولية فالمنطقة، من بعد ما ولات سرية ديال الدرك الملكي السوالم بإقامات (شمس سيدي رحال). هاد التحركات كتدخل فإطار الخطة الأمنية اللي حطات القيادة الجديدة للدرك الملكي بسرية السوالم، واللي الهدف ديالها تجفيف منابع هاد التجارة السوداء والحد من تداعياتها الخطيرة على ساكنة سيدي رحال والضواحي.