كود الرباط//

فواحد اللحظة اللي كتجمع ما بين الثقافة والسياسة، زار السفير الفلسطيني فالمغرب، جمال الشويكي، رواق دولة الإمارات ضيف شرف فالمعرض الدولي للنشر والكتاب، فالدورة 30 اللي كتنعقد حاليا فالعاصمة الرباط. الزيارة وقعات اليوم الجمعة وكانت فيها مساجات، خصوصاً أنها جات بعد أيام قليلة فقط من تقديم السفير الإسرائيلي أوراق اعتمادو فالإمارات.

السفير الشويكي اختار يكون حاضر، مرحّب، ومتفاعل، ورفض يسقط ففخ المقاطعة أو التصعيد. هاد الموقف كيعكس واحد العقلانية والواقعية فالتعامل مع الوضع السياسي، وبعيد كل البعد على لغة التخوين والمزايدات اللي ولى كيروجو ليها بعض الإسلاميين فالمغرب، واللي نهار وما طال  وهوما يهاجمو صحفيين ونشطاء فقط لأنهم عندهم مواقف مؤيدة للتطبيع أو مختلفين معاهم فالرأي.

زيارة السفير الفلسطيني كتعطينا درس واضح: القضية الفلسطينية ما محتاجاش شعارات خاوية، بل محتاجا لرجال كيشتغلو بعقل ورزانة، كيحضرو فالساحات المهمة، وكيعرفو كيفاش يوصلو الرسالة بلا ضجيج. الثقافة حتى هي مساج ومقاومة بالفكر

البارح، الخميس، كانت الرباط على موعد مع هاد الحدث الثقافي، بحيث ترأس الأمير مولاي رشيد افتتاح المعرض الدولي للنشر والكتاب، ففضاء “أو إل إم – السويسي”. الافتتاح جا تحت رعاية الملك محمد السادس.

الأمير مولاي رشيد دار جولة فعدد من الأروقة، من بينهم رواق إمارة الشارقة – اللي جاية كضيف شرف فهاد الدورة – واللي كتحتافي بالعلاقات التاريخية والثقافية بين المغرب والإمارات. وزار كذلك رواق فلسطين، ووزارة الشباب والثقافة والتواصل، ومؤسسات بحال سوشبريس، ودار الأمان، وعالم السنافر.

المعرض هاد العام كيعرف مشاركة 756 عارض من 51 دولة، من بينهم 292 عارض مباشر و464 عارض بالوكالة.