كود الرباط//

البرلماني عبد النبي عيدودي، المشهور بـ”كشة مشة”، ممسوقش للقضاء، كيف دار صاحبو فالحزب محمد مبدع لي ترشح للجنة العدل والتشريع واخا متابع فملفات جرائم أموال فالقضاء، قبل ما يستقل ويتعتقل.

عيدودي، وخا صدر في حقو قرار محكمة النقض غير الاربعاء لي فاتت، وللي فيه تأييد الحكم عليه بالسجن غير النافذ، اليوم حضر فلقاء لجنة القطاعات الإنتاجية وخدا كلمة باسم الفريق الحركي قدام وزير الصناعة.

البرلماني لي كيتسناه قرار العزل من رئاسة الجماعة الترابية الحوافات، ومن الصفة البرلمانية، عطا صورة خايبة للبرلمان وصورة خايبة لزعيمو محمد أوزين، لي كايقول بلي باغي تخليق الحياة السياسية وبأنه مسار نقي ووو.. ولكن علاش باقي مدرتيش تجميد عضوية اللي متورطين فالملفات ديال الفساد منهم عيدودي ومبدع وغيرهم.

عيدودي تمت إدانته ابتدائيا واستئنافيا بالحبس موقوف التنفيذ سنتين بتهمة تبديد أموال عمومية بجماعة الحوافات، التابعة لإقليم سيدي قاسم،.

وأيدت محكمة الاستئناف بالرباط الحكم الصادر في حق البرلماني رئيس جماعة دار الكداري بإقليم سيدي قاسم، بعدما تم اتهامه من طرف مستشارين باختلاس أموال عمومية من خلال عدم مطابقة ما تم إنجازه على أرض الواقع لما هو مضمن في دفتر التحملات الخاص بأحد المشاريع بالجماعة.