أميمة عطية – كود كازا ///

دارت “كود” جولة فدرب عمر فالداربيضاء الصباح الاثنين 7 شتنبر ،  تزامناً مع أول نهار فالدخول المدرسي 2027- 2028،

ووقفت على الرواج الكبير اللي كيعرفو السوق، بالخصوص عند الفراشة لي كيبيعو الكتب والدفاتر وباقي المستلزمات المدرسية، وسط إقبال كبير ديال الآباء والأمهات وتلامذ.

وحاولات “كود” تهضر مع عدد من الباعة باش تعرف تفاصيل أكثر على أثمنة الكتب والدفاتر والأغلفة والستيلوات وباقي اللوازم، وعلى السبب لي  كيخلي البيضاويين باقين كيقصدو درب عمر كل عام، ولكن عدد من الباعة امتنعو عن الإدلاء بأي تصريح، ففيديو وكالو لـ“كود” إنهم ما بغاوش يهضرو مع الصحافة، بعدما، حسب ما صرح به بعضهم، توصلو بتعليمات من السلطات المحلية بعدم الحديث مع وسائل الإعلام باش ماتيجبدش ليهم الصداع على احتلال الملك العمومي، والغريب فالأمر ان درب عمر معروف برواجو الاقتصادي الكبير من صحاب الحوانت وحتا الفراشة.

وحترمات “كود” رغبة الباعة اللي ما بغاوش يهضرو، خصوصاً أنهم أكدو على أنهم  كيتفاداو أي مشكل مع السلطات، غير أن السؤال اللي كيبقى مطروح هو: علاش الباشا أولقايد أوالسلطات عموما و التابعة ليهم المنطقة، غادي يتدخلو باش يمنعو صحاب الفراشة من التواصل مع الصحافة؟

واش هاد المنع، جا بسبب إجراءات كتقوم بها السلطات المحلية فالمنطقة بخصوص طريقة عرض السلع واستغلال الفضاء اللي قدام المحلات، وواش مرتبط بتنظيم الملك العمومي ومراقبة الاستغلال ديالو، ولا كيتجاوز هاد الجانب؟

فالمقابل، كيعرف درب عمر فهاد الفترة دينامية اقتصادية مهمة، وخصوصاً مع الدخول المدرسي، بحيث كتولي المنطقة وجهة للآباء والأمهات اللي لي كيقلبو على الكتب والدفاتر والأغلفة والستيلوات والمحافظ وباقي المستلزمات.

وفهاد السياق صرحو عدد من المواطنين والآباء والأمهات لـ“كود” بأنهم من شحال هادي وهما كيفضلو يشريو مستلزمات الدخول المدرسي من درب عمر، حيت، كاين الرخا والأثمنة كتكون مناسبة مقارنة مع عدد من نقط البيع الأخرى، خصوصاً ملي كتكون الأسرة مطالبة بشراء لائحة طويلة ديال اللوازم.