الرئيسية > آش واقع > دراسة: 96 فالمية دالمغاربة خايفين من تفشي فيروس “كورونا”.. و74 فالمية متايقينش فقدرة المستشفيات المغربية فمواجهتو
23/03/2020 15:30 آش واقع

دراسة: 96 فالمية دالمغاربة خايفين من تفشي فيروس “كورونا”.. و74 فالمية متايقينش فقدرة المستشفيات المغربية فمواجهتو

دراسة: 96 فالمية دالمغاربة خايفين من تفشي فيروس “كورونا”.. و74 فالمية متايقينش فقدرة المستشفيات المغربية فمواجهتو

عفراء علوي محمدي- كود//

كشفات دراسة ميدانية دارها المعهد المغربي لتحليل السياسات على فيروس “كورونا” المستجد، بللي 96 فالمية من المستجوبين خايفين لا ينتشر الفيروس فالمغرب، 3 فالمية منهم ماخايفينش، و1 فالمية فقط اللي كَاع ما مسوقين.

الدراسة، اللي دارت على عينة من 2470 شخص، كشفات بللي 58 فالمائة من العينة المستجوبة دايرين ثقتهم في جهود الحكومة لمحاصرة وباء “كورونا”، و74 فالمائة قالو بللي مكايثيقوش فقدرة المستشفيات المغربية على مواجهة آثار الفيروس، مقابل 26 فالمية اللي ثايقين فقدرتها على علاج المرضى المصابين بيه.

وأكدو 81 من المستجوبين بللي خايفين لا يتقاسو بالفيروس، وبزاف منهم ملتزمين بنصائح وإرشادات وزارة الصحة، وعلى هذشي 91 فالمية ملتزمين بغسيل اليدين، و82 تفاداو الخروج من البيت إلا للضرورة، و12 فالمية فقط اللي لبسو الكمامات الطبية.

بالنسبة للقرارات اللي تاخداتها الداخلية، 100 فالمية من المستجوبين عاجبهم قرار منع التجمعات الكبيرة ومنع السفر، 99 متفقين مع قرار توقيف الدراسة، و90 فالمية عاجبهم قرار إغلاق المساجد.

الخوف والقلق خلا المستجوبين كذلك مايفكروش فالسفر فحالة ما تفشى الفيروس، حيت 88 فالمية منهم مكايفكروش فالسفر من المكان اللي ساكنين فيه، و12 فالمية فقط اللي قالو بللي كيفمرو يمشيو لمدينة خرى أو قرية إلى وقع هذشي.

وبالنسبة للكمية ديال المشتريات اللي كيشريو كل يوم، أكدو 84 فالمية من المستجوبين بللي ماتغيراتش العادة الشرائية ديالهم على المعتاد، و16 فالمية صرحو بللي شراو أكثر من المعدل العادي، 93 فالمية خدام المواد الغذائية، 70 فالمية مواد التنظيف، 28 فالمية شراو الأدوية.

والمستجوبين بينو على اهتمامهم بمعرفة آخر مستجدات انتشار الفيروس، 48 فالمية منهم قالو بللي كيتابعو انتشارو لحظة بلحظة، 44 فالمية كيتابعو الانتشار ديالو بشكل يومي، 7 فالمية كيتابعو الأخبار بشكل متقطع، واللي مكايتابعو والو كيشكلو 1 فالمية.

وبخصوص للإرشادات اللي خاصهم يتبعوها باش مايتنشرش المرض، ف88 فالمية خداوها من الأنترنت، 68 من وزارة الصحة، 11 فالمية من أطباء، و5 فالمية من صيادلة، و19 فالمية من الأصدقاء.

موضوعات أخرى