كود – طنجة//
كشفت دراسة علمية جديدة تنشرات فمجلة دولية، أن نسبة مهمة من الطلبة الجامعيين فطنجة كيبانو عندهم مؤشرات مرتبطة بصعوبات التركيز والانتباه وفرط الحركة.
الدراسة اللي شملت 819 طالب وطالبة من المؤسسات التابعة لجامعة عبد المالك السعدي، لقات أن 45.05 فالمائة من المشاركين سجلو نتائج إيجابية فاختبار أولي مخصص للكشف على أعراض هاد الاضطراب.
وحسب الدراسة اللي تنشرات نهار 8 شتنبر 2026 فالمجلة العلمية الدولية Archives of Psychiatric Nursing، فـ369 طالب وطالبة من أصل 819 تجاوزو العتبة المعتمدة فاختبار التقييم، وهو ما كيطرح تساؤلات على الصعوبات المرتبطة بالتركيز والانتباه وسط الطلبة.
البحث اللي شارك فيه عدد من الباحثين، من بينهم سارة إشاطر وياسين بنحدوش وفاروق الأزرق وفضيلة بوسغيري وعادل النجدي وعادل العموري، كيهذف لفهم انتشار المؤشرات المرتبطة باضطراب نقص الانتباه وفرط الحركة وسط الشباب الجامعي، ورصد العوامل اللي ممكن تكون مرتبطة بهاد الأعراض.
واعتمد الباحثون على معطيات تجمعات ما بين مارس وشتنبر 2024، من خلال استبيانات جاوبو عليها الطلبة براسهم، باستعمال مقياس علمي معروف باسم «ASRS-v1.1»، اللي كيستعمل للكشف الأولي على أعراض اضطراب نقص الانتباه وفرط الحركة عند البالغين.
التحليل الإحصائي بين بلي كاينة علاقة بين النتائج الإيجابية للاختبار وعدد من العوامل المرتبطة بالحياة اليومية والمسار الدراسي، خصوصاً مشاكل النوم والصعوبات الأكاديمية، ز بعض الظروف الأسرية.
وفهاد السياق، الطلبة اللي صرحو بأنهم كيعانيو من صعوبات فالدراسة كانت عندهم احتمالات تسجيل نتيجة إيجابية فالاختبار أكبر ب 7.13 مرات مقارنة بالفئة المرجعية، بينما وصل هاد الاحتمال ل 3.61 مرات عند الطلبة اللي كيعانيو من مشاكل مرتبطة بالنوم.
ورصدات الدراسة حتى ارتباطات إحصائية مع بعض المتغيرات الأسرية، من بينها طلاق الوالدين، وكون الأم كان عمرها كبر 40 سنة وقت الإنجاب. ولكن هاد النتائج ما كتثبتش أن هاد الظروف هي السبب المباشر فظهور اضطراب نقص الانتباه وفرط الحركة.
وكتكتسي هاد المعطيات أهمية خاصة، بالنظر للضغوط اللي كتفرضها الحياة الجامعية على الطلبة، سواء فتنظيم الوقت، ومتابعة الدروس، والتحضير للامتحانات، أو إنجاز البحوث والواجبات. وهي كلها مهام كتحتاج التركيز والقدرة على التخطيط وتنظيم الانتباه.
وعلى مستوى الجامعة، كتفتح هاد النتائج النقاش حول ضرورة الاهتمام بالصحة النفسية وصعوبات التركيز والانتباه عند الطلبة، خصوصاً أن هاد المشاكل ممكن تنعكس على النتائج الدراسية والاستمرار فالتعليم، حتى فالحالات اللي كيكون فيها الطالب ما عارفش الأسباب الحقيقية للصعوبات اللي كيواجه.