كود – وكالات //
فعدد من البلدان الصناعية، ولات العلاقات الجنسية بين الأزواج كتنقص بشكل ملحوظ. وحسب استطلاع للرأي دارو معهد «إيفوب» الفرنسي، ونشراتو جريدة «لوبوان» الفرنسية نهار الخميس 15 أكتوبر 2026، الثلث ديال العيالات اللي مرتبطات بعلاقة عاطفية أو زوجية، بنسبة 31 فالمية، صرّحو بأنهم ما بقاش كيمارسو الجنس مع الشريك ديالهم.
اليابان جات فالصدارة من حيث ضعف النشاط الجنسي بين الأزواج، بحيث 66 فالمية من العيالات المتزوجات أو اللي عايشين مع الشريك بلا زواج، قالو إنهم ما كيمارسوش الجنس معاه.
وكتفوت هاد النسبة بزاف الأرقام المسجلة فدول أخرى، بحال إيطاليا اللي وصلات فيها النسبة لـ18 فالمية، وألمانيا بـ24 فالمية، والولايات المتحدة الأمريكية بـ28 فالمية.
هاد المعطيات كتجي باش تكمل الدراسة لي تدارَت عام 2010 فمريكان، واللي سلطات الضوء على ظاهرة سميتها «الركود الجنسي»، فإشارة للتراجع المتزايد فممارسة الجنس داخل المجتمع.
وفرانسوا كراوس، الباحث فمعهد «إيفوب»، كيربط هاد التراجع بمجموعة ديال التحولات الاجتماعية والثقافية، من بينها ارتفاع متوسط عمر السكان، وتقليص الفوارق فمستوى المعيشة بين الرجال والعيالات، وزيادة الوعي بحقوق المرأة والاستقلالية ديالها، عاد التاتير ديال حركة «مي تو» اللي شجعات النساء يهضرو على الاعتداءات والتحرشات الجنسية.
وزاد الباحث أن الاهتمام المتزايد بمسألة الرضا المتبادل بين الطرفين فالعلاقة الجنسية، والتحولات اللي عرفها المجتمع فالنظرة للزواج والعلاقات الحميمية، كيساهمو حتى هما ففهم هاد التراجع.