كود – وكالات //
بينات دراسة تنشرات فمجلة علمية ديال الكيمياء الغذائية والفلاحية أن نص لتر ديال البيرة يقدر يعطي “مستويات مهمة” من واحد الفيتامين اللي كيعاون فالخدمة ديال الدماغ وهادشي كيشمل حتى البيرة بلا لالكول.
الباحثين حللو 65 نوع ديال البيرة الألمانية اللي كاينة فالسوق، باستعمال تقنية مخبرية جديدة، ولقاو أن نسبة فيتامين B6 كتبدل بزاف من نوع لنوع، ولكن فالغالب كانت أكثر من التقديرات القديمة.
فيتامين B6 الجسم ما كيصاوبوش بوحدو، وعندو دور مهم فالدماغ، فالدم، وفالمناعة و كيقولو الباحثين أن كاس واحد عادي ديال البيرة يقدر يغطي تقريباً 15% من الحاجة اليومية ديال هاد الفيتامين.
النقص فـفيتامين B6 كاين أكثر مما كيتصوّر الناس حيت تقريباً واحد من كل خمسة مراهقين فأوروبا عندهم نقص فيه، واحد من كل عشرة فـأمريكا ، وهاد النقص يقدر يدير الآكتئاب، أمراض القلب والشرايين، وحتى الالتهابات.
من بعد ما تحللو 65 نوع ديال البيرة، لقاو أن نسبة فيتامين B6 كاينة ما بين 95 حتى 1000 ميكروغرام فكل لتر، وهادشي حسب نوع البيرة.
.
بيرة “بوك” (Bock)، اللي كتكون تقيلة وكتتصاوب بكمية كبيرة من الشعير، كانت فيها أعلى نسبة، ب 808 ميكروغرام فكل لتر، من بعد كاتجي البيرة العادية (لاغر) ب 515 ميكروغرام، اما بيرة القمح والأرز كانت أقل على مكتقول الدراسة.