اميمة عطية كود ///

كشفت دراسة باقا جديدة ، صدرت فمارس 2026 أن راجل لي كينفق على شريكة ديالو ، سواء بكادوات هدايا ولا تجارب مشتركة ، خرجات زوينين، ماكلة ، وخصوصا فلوس ماشي غير سلوك اجتماعي، ولكن عندو تأثير مباشر على الصحة النفسية وجودة لحياة داخل لعلاقات.

دراسة ، اللي تابعات 152 رجل لمدة خمسة أسابيع، لقات أن لمشاركين اللي كينفقو بانتظام على شريكات ديالهم سجلو انخفاض فمستويات ستريس وتوتر وصل لـ23%، وتزاد حتى تحسن فبعض لمؤشرات الصحية المرتبطة بالاستقرار النفسي.

ووضحات نتائج، أن هاد النوع ديال الإنفاق كيعزز الإحساس برضا والدور داخل العلاقة، وفهادشي صرح عدد من المشاركين أنهم كيشعرو بتوازن نفسي أكبر وانخراط أقوى فحياتهم العاطفية.

هاد النتائج كتنتمي لمفهوم معروف فـالإنفاق الاجتماعي، اللي كيأكد أن صرف لفلوس على الآخرين، خصوصاً الشريك، كينشط مراكز المكافأة فالدماغ أكثر من الإنفاق على راسو .

وباختصار، العلم كيشير أن الإنفاق داخل العلاقة ماشي مجرد مسألة مادية، بل وسيلة لتعزيز الترابط العاطفي وتحقيق نوع من الراحة النفسية، لكن بشرط يكون مبني على التفاهم والتوازن بين الطرفين، ماشي على الضغط أو الفرض الاجتماعي، وبينات دراسة ان لمرا كتموت على رجل لكريم اكتر.