كود – وكالات //

إلى كنتي كتفكر بزاف قبل ماتنعس، راه ممكن  الستريس ما يبقاش غير مشكل نفسي، ولكن يأثر حتى على الحياة الجنسية ديالك.

دراسة جديدة ربطات بين الضغط النفسي القوي وارتفاع هرمون الكورتيزول من جهة، وانخفاض هرمون التستوستيرون وظهور مشاكل فالانتصاب من جهة أخرى.

باحثين من قسم جراحة المسالك البولية بكلية الطب فجامعة هانغتشو فالصين راجعو أبحاث على  العلاقة بين الضغط النفسي والصحة الجنسية عند الرجال، وركزو بشكل خاص على تأثير الستريس الدايم على الهرمونات والأداء الجنسي.

الدراسة شملات 826 رجل خدامين بدوام كامل، ولقات أن الرجال اللي مصنفين ضمن الفئة اللي كتعاني من ضغط نفسي طالع  عندهم معدل أكبر بزاف ديال ضعف الانتصاب.

وحسب النتائج، 54.37 فالمية من هاد الفئة  كيعانيو من هاد المشكل، مقابل نسبة أقل بشكل كبير عند الرجال اللي مستويات الستريس عندهم ناقصة.

الباحثين ربطو هاد العلاقة بالكورتيزول، اللي معروف بهرمون التوتر، واللي كيرتفع ملي الإنسان كيكون تحت ضغط نفسي مستمر. ووفق المعطيات اللي عرضاتها الدراسة، ارتفاع الكورتيزول كيكون مرتبط بانخفاض مستويات التستوستيرون، وهو الهرمون الرئيسي المرتبط بالوظيفة الجنسية عند الرجال.

واللافت هو أن التغييرات الهرمونية، حسب الباحثين، ما كتوقعش بالضرورة فنفس الوقت مع ظهور المشكل. ارتفاع الكورتيزول ممكن يسبق انخفاض التستوستيرون بجوج حتى لأربع سيمانات، أما التغييرات فالتستوستيرون ممكن تسبق ظهور ضعف الانتصاب بأربع حتى لستة سيمانات.

والباحثين كيشوفو أن فهم هاد السلسلة بين الستريس، الكورتيزول، التستوستيرون والانتصاب ممكن يعاون فالتعامل مع المشكل من الأصل، خصوصاً عند الرجال اللي عايشين تحت ضغط مهني ونفسي مستمر.