كود – وكالات//

كشفات دراسة عالمية جديدة أن ألمانيا تصدرات لائحة الدول الأكثر نرجسية فالعالم، وجات من بعدها الشينوا وإيران، المفاجأة أن ماريكان، اللي بزاف كيعتابروها من أكثر الدول اللي فيها هاد الصفة، خدات غير المرتبة 16 من أصل 53 دولة شملها البحث، اللي دارتو جامعة ولاية ميشيغان.

الدراسة شملات 45 ألف و800 شخص من دول مختلفة، وبحثات فكيفاش كتأثر الجنسية والجنس والإحساس بالمكانة الاجتماعية على الصفات النرجسية، الباحثين طلبو من المشاركين يجاوبو على عبارات بحال: “أنا كنستحق نكون محور الاهتمام بسبب مساهماتي الميزة”، أو “كنبغي المنافسين ديالي يفشلو”، ومن بعد قيمو درجات النرجسية ديالهم.

الباحثين ركزو على صفات بحال حب لفت الانتباه، والرغبة فإعجاب الناس، والحاجة لترويج صورة الشخص على راسو.

أما أقل الدول نرجسية، فكانت صربيا وإيرلندا وبريطانيا وهولندا والدنمارك، الدراسة لقات حتى أن الشباب كيبانو أكثر نرجسية من الناس الكبار فالسن، لأنهم مازال كيبنيو هويتهم وكيبحثو على الاعتراف والاهتمام، كيف ما بينات الدراسة أن الرجال سجلو معدلات نرجسية أعلى من العيالات.